ముందు జగన్, తర్వాతే రోశయ్య

హైదరాబాద్: కడప పార్లమెంటు సభ్యుడు వైయస్ జగన్ వ్యవహారం ఈ నెలాఖరున ఒక కొలిక్కి రావచ్చునని భావిస్తున్నారు. పార్టీ అధిష్టానం నుంచి వైయస్ జగన్ కు ఎప్పుడైనా పిలుపు రావచ్చునని ఆయన వర్గీయులు అంటున్నారు. ముందు జగన్ ను పిలిచి మాట్లాడిన తర్వాతనే ముఖ్యమంత్రి కె. రోశయ్యను ఢిల్లీకి పిలిపించే అవకాశాలున్నట్లు చెబుతున్నారు. జగన్ ముందు తమ ప్యాకేజీని పెట్టి, దానికి ఆయన అంగీకరించిన తర్వాత రోశయ్యను పిలిచి మాట్లాడే అవకాశం ఉంది. జగన్ కు ఉప ముఖ్యమంత్రి పదవిని, కేంద్రంలో మంత్రి పదవిని పార్టీ అధిష్టానం ఇవ్వజూపుతున్నట్లు వార్తలు వచ్చాయి.

జగన్ వర్గం మాత్రం ఆయనకు ముఖ్యమంత్రి పదవిని ఇవ్వాలని పట్టుబడుతున్నాయి. జగన్ వర్గం చల్లారేదాకా నిరీక్షించాలనే ఉద్దేశంతో పార్టీ అధిష్టానం జాప్యం చేస్తూ వచ్చింది. ఇక ఎంతో కాలం ఆగడం మంచిది కాదనే ఉద్దేశంతో పార్టీ అధిష్టానం ఉన్నట్లు తెలుస్తోంది. జగన్ ఏదో ఒక దానికి అంగీకరించిన తర్వాత రోశయ్యకు తనదైన మంత్రి వర్గాన్ని ఏర్పాటు చేసుకోవడానికి గ్రీన్ సిగ్నల్ ఇవ్వాలని అనుకుంటున్నట్లు తెలుస్తోంది. అంత వరకు రోశయ్య ప్రస్తుత మంత్రివర్గంతోనే కొనసాగాల్సి ఉంటుంది.