మహారాష్ట్ర, హర్యానాల్లో కాంగ్రెసు ముందంజ

న్యూఢిల్లీ: మహారాష్ట్ర, హర్యానా రాష్ట్రాల్లో కాంగ్రెసు ముందంజలో ఉంది. మహారాష్ట్ర, హర్యానా, అరుణాచల్ ప్రదేశ్ శాసనసభలకు జరిగిన ఎన్నికల్లో ఓట్ల లెక్కింపు గురువారం ఉదయం ప్రారంభమైంది. లెక్కింపు ప్రారంభమైన తర్వాత మహారాష్ట్ర, హర్యానాల్లో కాంగ్రెసు ముందంజలో ఉన్నట్లు కనిపిస్తోంది. మహారాష్ట్రలో మాత్రం కాంగ్రెసుకు విజయం సునాయసంగా లభించే అవకాశాలు కనిపించడం లేదు. కాంగ్రెసు, ఎన్సీపి కూటమికి బిజెపి, శివసేన కూటమి గట్టి పోటీ ఇస్తోంది. గురువారం ఉదయం 8 గంటల 45 నిమిషాల ప్రాంతంలో కాంగ్రెసు 34 స్థానాల్లో, ఎన్సిపీ 19 స్థానాల్లో, బిజెపి 16, శివసేన 25 స్థానాల్లో ముందంజలో ఉన్నాయి.

అయితే బిజెపి, శివసేన కూటమి లెక్కింపు జరుగుతున్న కొద్దీ ముందుకు సాగే ధోరణి కనిపిస్తోంది. దీంతో కాంగ్రెసు, ఎన్సీపి వర్గాల్లో ఉత్కంఠ నెలకొంది. ముంబయిలో బిజెపి - శివసేన ఆధిక్యాన్ని కనబరుస్తుండగా కొంకణ్ ప్రాంతంలో కాంగ్రెసు ఆధిక్యత కనబరుస్తోంది. విదర్భలో కాంగ్రెసుకు వ్యతిరేకత కనిపిస్తోంది. కాగా, హర్యానాలో కాంగ్రెసు ముందంజలో సాగుతోంది. అరుణాచల్ ప్రదేశ్ లో కూడా కాంగ్రెసు ముందంజలో ఉంది. అరుణాచల్ ప్రదేశ్ లో కాంగ్రెసు హవా వీస్తోంది.