రోశయ్య పేరుకే పెద్ద మనిషి: కెసిఆర్

సిద్ధిపేట: ముఖ్యమంత్రి కె.రోశయ్య పేరుకే పెద్ద మనిషి అని, హైదరాబాద్ ఫ్రీజోన్ విషయంలో రోశయ్య చెప్పేవన్నీ అబద్ధాలేనని తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు అన్నారు. ఉద్యోగ గర్జన పేరుతో బుధవారం సాయంత్రం మెదక్ జిల్లా సిద్ధిపేటలో నిర్వహించిన భారీ బహిరంగ సభలో ఆయన మాట్లాడారు. కేంద్ర, రాష్ట్ర ప్రభుత్వాలపైనే కాకుండా తెలుగుదేశం పార్టీ అధ్యక్షుడు నారా చంద్రబాబు నాయుడిపై కూడా ఆయన తీవ్రంగా ధ్వజమెత్తారు. హైదరాబాద్ ఫ్రీజోన్ కాదని శాసనసభలో తీర్మానం చేయాలని ఆయన డిమాండ్ చేశారు. ఫ్రీజోన్ విషయంలో కాంగ్రెసు సహా అన్ని పార్టీలు కూడా తోడు దొంగలేనని ఆయన అన్నారు. సుప్రీంకోర్టులో ప్రభుత్వం సరిగా వాదించకపోవడం వల్లనే హైదరాబాద్ ఫ్రీజోన్ అనే తీర్పు వచ్చిందని ఆయన అన్నారు.

హైదరాబాద్ ఫ్రీజోన్ కాదని శాససనభలో తీర్మానం చేయకపోతే పెన్ డౌన్, గన్ డౌన్ చేస్తామని ఆయన హెచ్చరించారు. పాలనను స్తంభింపజేస్తామని ఆయన హెచ్చరించారు. ఈ నెల 28వ తేదీన జైలో భరో కార్యక్రమం నిర్వహిస్తున్నట్లు ఆయన తెలిపారు. దమ్ముంటే ఈ జైల్ భరో కార్యక్రమంలో పాల్గొనాలని ఆయన చంద్రబాబును డిమాండ్ చేశారు. ఇక ఓపిక పట్టేది లేదని, ఎలాంటి పోరాటానికైనా తాము సిద్ధంగా ఉన్నామని ఆయన అన్నారు. తెలంగాణ విషయంలో ప్రధాని మన్మోహన్ సింగ్ మాట తప్పారని ఆయన అన్నారు. 610 జీవోను చంద్రబాబు కూడా పట్టించుకోలేదని ఆయన అన్నారు. చంద్రబాబు ప్రతిపక్ష నాయకుడిగా కూడా పనికి రారని ఆయన అన్నారు.