మళ్లీ తెర మీదికి అల్లు అరవింద్

హైదరాబాద్: ప్రజారాజ్యం పార్టీ అధినేత చిరంజీవి బావమరిది, పార్టీ నాయకుడు అల్లు అరవింద్ మళ్లీ రాజకీయ తెర మీదికి వచ్చారు. గ్రేటర్ హైదరాబాద్ ఎన్నికల షెడ్యూల్ వెలువడడంతో ఆయన తిరిగి రంగం మీదికి వచ్చారు. ఆయన గురువారం పార్టీ ముఖ్యులతో ఆయన సమావేశమయ్యారు. గ్రేటర్ హైదరాబాద్ ఎన్నికల్లో అనుసరించే వ్యూహంపై ఆయన చర్చించినట్లు సమాచారం. ఇటీవల ప్రకటించిన పార్టీ కమిటీల్లో అల్లు అరవింద్ పేరు లేకపోవడం కొంత చర్చనీయాంశంగా మారింది. అయితే పార్టీలో పదవి లేనప్పటికీ ఆయన కీలక పాత్ర పోషించడం తప్పదనేది గురువారంనాటి సమావేశం తెలియజేస్తోంది.

ఇతర పార్టీలతో పొత్తు పెట్టుకునే విషయంపై పార్టీలో చర్చ జరుగుతోంది. గ్రేటర్ ఎన్నికల కోసం ప్రజారాజ్యం ఒక క్రమశిక్షణా సంఘాన్ని కూడా ఏర్పాటు చేసింది. పార్టీ సీనియర్ నాయకుడు హరిరామ జోగయ్య ఈ సంఘానికి అధ్యక్షులుగా ఉంటారు. తలారి మనోహర్, సిహెచ్ రాజమౌళి, కడవల శ్రీకాంత్ రెడ్డి, దేవిశెట్టి శ్రీనివాసరావు ఈ సంఘం సభ్యులు.