ఎంఎఫ్ హుస్సేన్ రాకకు ఏర్పాట్లు

న్యూఢిల్లీ: వివాదాస్పద చిత్రాలకు గాను కోర్టు కేసులు ఎదుర్కుంటున్న ప్రముఖ భారత చిత్రకారుడు ఎంఎఫ్ హుస్సేన్ ను భారత్ కు రప్పించేందుకు కేంద్ర ప్రభుత్వం తగిన ఏర్పాట్లు చేస్తోంది. హుస్సేన్ పై ఉన్న కేసులను త్వరతిగతిన పరిష్కరించడానికి వీలుగా కేంద్రం సుప్రీంకోర్టును ఆశ్రయించనుంది. హుస్సేన్ పై దేశవ్యాప్తంగా ఉన్న కేసుల పరిష్కారానికి తాము కృషి చేస్తున్నామని, తద్వారా సాధ్యమైనంత త్వరగా హుస్సేన్ భారత్ తిరిగి రావడానికి వీలవుతుందని హోం మంత్రిత్వ శాఖ వర్గాలంటున్నాయి.

కోర్టు కేసుల కారణంగా కొన్నేళ్లుగా విదేశాల్లో ఉంటున్న హుస్సేన్ సాధ్యమైనంత త్వరగా భారత్ రావాలని కోరుకుంటున్నారు. ఇందుకు సంబంధించి ఆయన ఇటీవల ఒక భావోద్వేగపూరితమైన విజ్ఞప్తి కూడా చేశారు. చిత్రాలు సృజనాత్మక వ్యక్తీకరణలని అంటూ ఢిల్లీ హైకోర్టు నిరుడు హుస్సేన్ పై కొన్ని క్రిమినల్ ప్రొసీడింగ్స్ ను కొట్టేసింది. ఢిల్లీలో మూడు కేసులు పెండింగ్ లో ఉన్నాయని, దేశవ్యాప్తంగా ఎన్ని ఉన్నాయనేది చెప్పలేనని, హుస్సేన్ లాంటి వ్యక్తులు వేధింపులకు గురి కాకుండా కేంద్ర ప్రభుత్వం చట్ట సవరణలు తేవడం అవసరమని హుస్సేన్ తరఫు న్యాయవాది అఖిల్ సిబాల్ అంటున్నారు. హుస్సేన్ 2006 నుంచి దుబాయ్ లో ఉంటున్నారు.