పాక్ జైల్లో భారతీయుడి అనుమాస్పద మృతి

ఇస్లామాబాద్: పాకిస్తాన్ లోని ఓ జైలులో భారత జాతీయుడు అనుమానస్పద స్థితిలో మరణించాడు. ప్రముఖ మానవ హక్కుల కార్యకర్త అన్సార్ బర్నీ గురువారంనాడు చెప్పారు. లాహోర్ లోని కోట్ లఖ్పత్ జైలులో సూరజ్ సింగ్ అనే భారత జాతీయుడు బుధవారం అనుమానస్పద స్థితిలో మరణించినట్లు బర్నీ ఒక వార్తా సంస్థ ప్రతినిధితో చెప్పారు.

సూరజ్ సింగ్ కచ్చితంగా ఎలా మరణించాడనే విషయం తెలియడం లేదు. గత ఏడాది కాలంగా అతను జైలులో ఉంటున్నాడు. అతని మృతదేహాన్ని పంచనామా నిమిత్తం అస్పత్రికి తరలించారు. ఈ మరణంపై స్వతంత్ర, నిష్పాక్షిక విచారణ జరిపించాలని తాను డిమాండ్ చెసినట్లు బర్నీ తెలిపారు. సూరజ్ మృతదేహాన్ని సాధ్యమైనంత త్వరగా భారత్ కు పంపడానికి ఏర్పాట్లు చేస్తున్నట్లు ఆయన తెలిపారు.