కెసిఆర్ బ్రోకరులా మారుతున్నాడు: లగడపాటి

విశాఖపట్నం: మీడియా కోసం తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు బ్రోకరులా మారుతున్నారని కాంగ్రెసు పార్లమెంటు సభ్యుడు లగడపాటి రాజగోపాల్ వ్యాఖ్యానించారు. కెసిఆర్ ఉద్యమాలు కామెడీ ట్రాక్ లా నడుస్తున్నాయని ఆయన గురువారం మీడియా ప్రతినిధులతో అన్నారు. కెసిఅర్ చేపట్టిన జైల్ భరో కార్యక్రమం తెలంగాణ ప్రజలకు అన్యాయం జరిగే పద్ధతిలో ఉందని ఆయన అభిప్రాయపడ్డారు. రాజకీయ లబ్ధి కోసమే కెసిఆర్ ఫ్రీజోన్ వ్యవహారాన్ని వివాదాస్పదంగా మారుస్తున్నారని ఆయన విమర్శించారు.

కెసిఆర్ చేస్తున్న ఉద్యామాలు ప్రజా పోరాటాలు కావని, కెసిఆర్ రాజకీయ ఆరాటాలు మాత్రమేనని ఆయన అన్నారు. సుప్రీంకోర్టు ఇచ్చిన తీర్పులో ఫ్రీజోన్ ఎక్కడా లేదని ఆయన అన్నారు. గ్రేటర్ హైదరాబాద్ ఎన్నికలతో తెరాస నామరూపాలు లేకుండా పోతుందని ఆయన అన్నారు. కెసిఆర్ కు తెలంగాణ ప్రజలే బుద్ధి చెప్తారని ఆయన అన్నారు. సుప్రీంకోర్టులో పిటిషన్ వేసిన వ్యక్తి నల్లగొండ జిల్లాకు చెందినవాడని, అతని పిటిషన్ పై సుప్రీంకోర్టు తీర్పు ఇచ్చిందని, అంటే కెసిఆర్ తెలంగాణ ప్రజలకు వ్యతిరేకంగానే పోరాడుతున్నారని చెప్పాలని ఆయన అన్నారు.