భారీ వర్షాలకు నెల్లూరు జిల్లా విలవిల

హైదరాబాద్: భారీ వర్షాలకు నెల్లూరు జిల్లా విలవిలలాడుతోంది. చిత్తురు, గుంటూరు, ప్రకాశం జిల్లాల్లో కూడా భారీ వర్షాలు తీవ్ర నష్టం కలిగించాయి. బంగాళాఖాతంలో ఏర్పడిన అల్పపీడనం వల్ల ఈ జిల్లాల్లో వర్షాలు కురుస్తున్నాయి. మరో 24 గంటల పాటు అల్పపీడనం కొనసాగే అవకాశం ఉన్నట్లు వాతావరణ పరిశోధనా కార్యాలయం అధికారులు చెప్పారు. ఆ తర్వాత అది వాయుగుండంగా మారే అవకాశం ఉంది. దీని ప్రభావం వల్ల దక్షిణ కొస్తా జిల్లాలో, రాయలసీమలో భారీ వర్షాలు కురిసే అవకాశం ఉంది. నెల్లూరు జిల్లాలో భారీ వర్షాలకు 11 చెరువులకు గండ్లు పడినట్లు సమాచరాం.

నెల్లూరు జిల్లాలో ఆదివారం రాత్రి గూడూరు - రేణిగుంట మార్గంలో వెంకటగిరి దగ్గర్లో యాతలూరు రైల్వే స్టేషన్ వద్ద 44 కిలో మీటర్ల మేర ట్రాక్ కుంగింది. దీంతో సాయంత్రం 4 గంటల నుంచి రాత్రి 7 గంటల దాకా రైళ్ల రాకపోకలు స్తంభించాయి. నెల్లూరు జిల్లాలో 10 వేల ఎకరాల మేర నారుమళ్లు నీట మునిగాయి. దాదాపు 400 కిలో మీటర్ల మేర ఆర్ అండి బి రోడ్లు, వేయి కిలోమీటర్ల మేర పంచాయతీ రోడ్లు దెబ్బ తిన్నాయి. జిల్లాలో నష్టం 2 కోట్ల రూపాయల మేర నష్టం ఉంటుందని ఒక అంచనా. గూడూరు, కావలి డివిజన్లలో వర్షం తీవ్ర ప్రభావం చూపుతోంది. నెల్లూరు జిల్లాలో పలు గ్రామాలు జలదిగ్బంధంలో చిక్కుకున్నాయి. పలు రైళ్లు ఆలస్యంగా నడిచాయి.