చెప్పులు కుట్టిన జూనియర్ డాక్టర్లు

హైదరాబాద్: ఉపకార వేతనం పెంచాలని డిమాండ్ చేస్తూ జూనియర్ డాక్టర్లు మంగళవారం రెండో రోజు కూడా తమ సమ్మెను కొనసాగించారు. వారు మంగళవారం వినూత్నంగా తమ నిరసనను వ్యక్తం చేశారు. ఈ డిమాండ్ తో గత నెల నుంచి వారు ఆరోగ్యశ్రీ సేవలను బహిష్కరిస్తూ వచ్చారు. తమ సమ్మెలో భాగంగా జూనియర్ డాక్టర్లు కూరగాయలు, పేపర్లు అమ్ముతూ, చెప్పులు కుడుతూ నిరసన వ్యక్తం చేశారు. టీలు అమ్ముతూ కూడా తమ నిరసనను వ్యక్తం చేశారు.

రాష్ట్రవ్యాప్తంగా జరుగుతున్న సమ్మెలో భాగంగా జూనియర్ డాక్టర్లు గాంధీ అస్పత్రి వద్ద సంబంధిత మంత్రి పితాని దిష్టిబొమ్మను దగ్ధం చేశారు. ప్రభుత్వం స్పందించకపోతే బుధవారం నుంచి అన్ని రకాల సేవలను ఆపేస్తామని జూనియర్ డాక్టర్లు చెబుతున్నారు. మూడు రోజులుగా తాము విజ్ఞప్తి చేస్తున్నా ప్రభుత్వం పట్టించుకోవడం లేదని వారంటున్నారు. జూనియర్ డాక్టర్ల సమ్మెతో రోగులు తీవ్ర ఇబ్బందులకు గురవుతున్నారు.