విజయవాడ ఆస్పత్రిలో 6గురు పసికందుల మృతి

విజయవాడ: కృష్ణా జిల్లాలోని విజయవాడలో ఆరుగురు పసికందులు మృతి చెందారు. ఈ సంఘటన విజయవాడలో తీవ్ర విషాదాన్ని కలిగించింది. ఇంకుబేటర్స్, ఆక్సిజన్ వ్యవస్థ దెబ్బ తినడం వల్ల పసికందులు మరణించినట్లు వారి తల్లిదండ్రులు అంటున్నారు. ఈ మృత్యువులతో ఆస్పత్రి వద్ద ఉద్రిక్త వాతావరణం నెలకొని ఉంది. మరో తొమ్మిది పసికందులు ఇంకబేటర్స్ పై ఉన్నారు. వారి పరిస్థితి కూడా ఆందోళనకరంగా ఉంది.

ముగ్గురు పసికందులవి సహజ మరణాలని వైద్యులు చెబుతున్నారు. అయితే వైద్యుల నిర్లక్ష్యం వల్లనే తమ పిల్లలు మరణించారని తల్లిదండ్రులు ఆగ్రహం వ్యక్తం చేస్తున్నారు. పసికందుల తల్లిదండ్రులు ధర్నాకు దిగారు. పసికందుల మరణాలపై విచారణ జరుపుతున్నట్లు ఆస్పత్రి రెసిడెంట్ వైద్యాధికారి పి. రామగోపాల్ చెప్పారు. సంఘటనపై జిల్లా కలెక్టర్ పియూష్ కుమార్ విచారణకు ఆదేశించారు. తెలుగుదేశం శాసనసభ్యుడు దేవినేని ఉమామహేశ్వర రావు ఆస్పత్రిని సందర్శించి వైద్యుల నిర్లక్ష్యాన్ని విమర్శించారు. స్థానిక కాంగ్రెసు శాసనసభ్యుడు మల్లాడి విష్ణు కూడా ఆస్పత్రిని సందర్శించారు.