సచివాలయ ముట్టడి: నేతల అరెస్టు

హైదరాబాద్: తమ డిమాండ్ల సాధనకు నేషనల్ మజ్జూర్ యూనియన్ (ఎన్ఎంయు) తలపెట్టిన సచివాలయ ముట్టడి కార్యక్రమం మంగళవారం ఉద్రిక్తంగా మారింది. వేలాది మంది ఆర్టీసి కార్మికులు ఇందిరా పార్కు నుంచి సచివాలయాన్ని ముట్టడించడానికి పూనుకున్నారు. వారిని పోలీసులు అడ్డుకోవడానికి ప్రయత్నించారు. దీంతో పోలీసులకు, ఆర్టీసి కార్మికులకు మధ్య తోపులాట జరిగింది. పోలీసులు కార్మికులపై లాఠీచార్జీ చేశారు. పరిస్థితి ఉద్రిక్తంగా మారింది.

ఎన్ఎంయు నేతలు నాగేశ్వరరావు, మహ్మద్ లతో పాటు పలువురిని పోలీసులు అదుపులోకి తీసుకున్నారు. అరెస్టు చేసినవారిని పోలీసులు అంబర్ పేట పోలీసు గ్రౌండ్ కు తరలించారు. ఇందిరా పార్కు వద్ద ట్రాఫిక్ తీవ్ర అంతారయం కలిగింది. తమ ఆందోళనను అడ్డుకుంటే ఆందోళనను ఉధృతం చేస్తామని నాగేశ్వరరావు చెప్పారు. రాష్ట్రవ్యాప్తంగా బస్సులను నిలిపేస్తామని ఆయన చెప్పారు. తమ సమస్యలను పరిష్కరించకపోతే నిరవధిక సమ్మెకు దిగుతామని ఆయన ప్రభుత్వాన్ని హెచ్చరించారు.