చంద్రబాబు గల్లీ నాయకుడు: దానం

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు దేశ స్థాయి నాయకుడి స్థాయి నుంచి గల్లీ స్థాయి నాయకుడి స్థాయికి దిగజారారని కాంగ్రెసు గ్రేటర్ హైదరాబాద్ అధ్యక్షుడు దానం నాగేందర్ వ్యాఖ్యానించారు. చంద్రబాబు గ్రేటర్ హైదరాబాద్ ఎన్నికల్లో గల్లీ గల్లీ తిరుగుతున్నారని, చంద్రబాబు దేశ నాయకుడో, రాష్ట్ర నాయకుడో, గల్లీ నాయకుడో తేల్చుకోవాలని ఆయన శుక్రవారం మీడియా ప్రతినిధులతో అన్నారు. గ్రేటర్ హైదరాబాద్ ఎన్నికల్లో కడప పార్లమెంటు సభ్యుడు వైయస్ జగన్ ప్రచారంతో తాము గెలిచి తీరుతామని ఆయన ధీమా వ్యక్తం చేశారు. గ్రేటర్ హైదరాబాద్ ఎన్నికల్లో గెలిచి దివంగత నేత వైయస్ రాజశేఖర రెడ్డి లక్ష్యాన్ని నెరవేరుస్తామని ఆయన అన్నారు.

ముఖ్యమంత్రి కె.రోశయ్య ప్రచారం చేయకున్నా, ప్రదేశ్ కాంగ్రెసు కమిటీ (పిసిసి) నేత డి. శ్రీనివాస్ పూర్తి స్థాయిలో ప్రచారం చేయకున్నా తాము గెలిచి తీరుతామని ఆయన అన్నారు. గ్రేటర్ హైదరాబాద్ లో కనీసం వంద సీట్లు గెలుకోవాలనేది వైయస్సార్ లక్ష్యమని, తాము కచ్చితంగా 75 నుంచి 80 సీట్లు గెలిచి తీరుతామని ఆయన చెప్పారు. జగన్ గురువారమే ప్రచారం ప్రారంభించాల్సిందని, అయితే పార్లమెంటు వైయస్సార్ మృతికి సంతాప తీర్మానం ప్రవేశపెడుతున్నందున ఢిల్లీలో ఉండాల్సి వచ్చిందని, దీంతో నేటి నుంచి ప్రచారం చేస్తున్నారని ఆయన చెప్పారు.