పోటీపై విజయలక్ష్మిదే నిర్ణయం: డిఎస్

హైదరాబాద్: కడప జిల్లా పులివెందుల శాసనసభా నియోజక వర్గంలో పోటీ చేసే విషయంపై దివంగత నేత వైయస్ రాజశేఖర రెడ్డి సతీమణి విజయలక్ష్మిదే తుది నిర్ణయమని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ అన్నారు. పులివెందుల అభ్యర్థిగా కాంగ్రెసు అభ్యర్థిత్వాన్ని పార్టీ అధిష్టానం ఖరారు చేసిన నేపథ్యంలో బుధవారం మీడియా ప్రతినిధుల సమావేశంలో ఆయన ఆ విషయం చెప్పారు. విజయలక్ష్మి పోటీ చేయాలని నిర్ణయం తీసుకుంటే అంతకన్నా కావాల్సిందేమీ లేదని ఆయన అన్నారు.

పోటీ చేయాలా వద్దా అనే విషయంపై విజయలక్ష్మి నిర్ణయం తీసుకుంటారని ఆయన చెప్పారు. పులివెందుల నుంచి వైయస్ రాజశేఖర రెడ్డి కుటుంబ సభ్యులే పోటీ చేస్తారని ఆయన చెప్పారు. పులివెందులలో ప్రతిపక్షాలు పోటీ చేయకపోవచ్చునని ఆశిస్తున్నట్లు ఆయన తెలిపారు. జాతీయ రాజకీయాల్లో వైయస్ రాజశేఖర రెడ్డి స్థానం సుస్థిరంగా ఉంటుందని ఆయన అన్నారు.