వైయస్ పథకాల వల్లే గెలుపు: రోశయ్య

హైదరాబాద్: గ్రేటర్ హైదరాబాదులో కాంగ్రెసు విజయానికి దివంగత నేత వైయస్ రాజశేఖర రెడ్డి చేపట్టిన సంక్షేమ పథకాలే కారణమని ముఖ్యమంత్రి కె. రోశయ్య అన్నారు. వైయస్ రాజశేఖర రెడ్డి చేసిన అభివృద్ధితోనే తమ పార్టీ ఆశించిన స్థాయిలో గ్రేటర్ హైదరాబాదులో స్థానాలు వచ్చాయని ఆయన అన్నారు. గ్రేటర్ హైదరాబాద్ ప్రజలకు ఆయన కృతజ్ఞతలు తెలిపారు.

కాంగ్రెసు అంటే ప్రజల మధ్య ఉండే పార్టీ అని ప్రజలు నమ్మి గ్రేటర్ హైదరాబాదు ఎన్నికల్లో తమ పార్టీని గెలిపించారని పార్టీ గ్రేటర్ హైదరాబాద్ అధ్యక్షుడు, రాష్ట్ర ఆరోగ్య శాఖ మంత్రి దానం నాగేందర్ అన్నారు. ఈ విజయాన్ని దివంగత నేత వైయస్ కు నివాళిగా సమర్పిస్తున్నట్లు ఆయన తెలిపారు. ఇది వైయస్ కు తమ తొలి బహుమతి ఆయన గురువారం మీడియా ప్రతినిధులతో అన్నారు. అభిమానులతో కలిసి ఆయన తన నివాసంలో విజయోత్సవాన్ని నిర్వహించుకున్నారు.