తెలంగాణ పరిష్కారం ఆలోచిస్తా: సోనియా

న్యూఢిల్లీ: తెలంగాణ సమస్య పరిష్కారం కోసం ఆలోచన చేస్తానని కాంగ్రెసు అధ్యక్షురాలు సోనియా గాంధీ కాంగ్రెసు తెలంగాణ పార్లమెంటు సభ్యులకు హామీ ఇచ్చారు. కాంగ్రెసు తెలంగాణ పార్లమెంటు సభ్యులు గురువారం పార్లమెంటు ఆవరణలో సోనియాను కలిసి తెలంగాణపై చర్చించారు. తెలంగాణపై తనకు అవగాహన ఉందని, దీని పరిష్కారానికి ఆలోచన చేస్తానని సోనియా వారితో చెప్పారు.

కాగా, మాజీ పార్లమెంటు సభ్యుడు వినోద్ కుమార్ నాయకత్వంలోని తెలంగాణ రాష్ట్ర సమితి (తెరాస) ప్రతినిధులు గురువారం బిజెపి అధ్యక్షుడు రాజ్ నాథ్ సింగ్ కలిశారు. పార్లమెంటు శీతాకాలం సమావేశాల్లోనే తెలంగాణ రాష్ట్ర ఏర్పాటుకు బిల్లును ప్రతిపాదించాలని యుపిఎ ప్రభుత్వంపై ఒత్తిడి తేవాలని వారు రాజ్ నాథ్ సింగ్ ను కోరారు. తాము తెలంగాణ రాష్ట్ర ఏర్పాటుకు కట్టుబడి ఉన్నామని రాజ్ నాథ్ సింగ్ చెప్పారు. తెలంగాణపై కాంగ్రెసు తన వైఖరి స్పష్టం చేయాలని ఆయన డిమాండ్ చేశారు.