అసెంబ్లీ వాయిదా: జై తెలంగాణ, జై ఆంధ్రా

హైదరాబాద్: వాయిదా తీర్మానాలపై ప్రతిపక్షాలు పట్టుబట్టడంతో మంగళవారం శాసనసభా కార్యక్రమాలు స్తంభించాయి. దీంతో సభను స్పీకర్ కిరణ్ కుమార్ రెడ్డి 15 నిమిషాల పాటు వాయిదా వేశారు. తాము ప్రతిపాదించిన తీర్మానాలపై తక్షణ చర్చకు ప్రతిపక్షాలు పట్టుబట్టాయి. స్పీకర్ కిరణ్ కుమార్ రెడ్డి ఎంత చెప్పినా ప్రతిపక్షాల సభ్యులు వినిపించుకోలేదు. దీంతో సభలో గందర గోళ వాతావరణం చోటు చేసుకుంది.

సభ వాయిదా పడిన తర్వాత కూడా తెలంగాణ రాష్ట్ర సమితి (తెరాస) సభ్యులు స్పీకర్ పోడియం వద్ద బైఠాయించారు. జై తెలంగాణ అంటూ నినాదాలు చేశారు. వారికి ప్రతిగా జై ఆంధ్రా అంటూ రాయచోటి శాసనసభ్యుడు శ్రీకాంత్ రెడ్డి నినాదాలు చేశారు. రాష్ట్రంలో పెరుగుతున్న విద్యుత్ కోత, రైతాంగ సమస్యలపై తెలుగుదేశం పార్టీ, ప్రత్యేక తెలంగాణ కోరుతూ శాసనసభలో తీర్మానంపై తెరాస, బిజెపి, ఉస్మానియా విశ్వవిద్యాలయంలో విద్యార్థులపై లాఠీచార్జీపై ప్రజారాజ్యం, తెలంగాణ ఉద్యమం - భయాందోళనలుపై సిపిఐ వాయిదా తీర్మానాలు ప్రతిపాదించాయి.