కాళ్లు మొక్కినా కెసిఆర్ వింటలేరు: హరీష్

హైదరాబాద్: తాము కాళ్లా వేల్లా పడినా దీక్ష విరమించడానికి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు వినడం లేదని పార్టీ శాసనసభ్యుడు, ఆయన మేనల్లుడు హరీష్ రావు చెప్పారు. కుటుంబ సభ్యులమంతా కెసిఆర్ ను దీక్ష విరమించాలని కోరామని, అయినా కెసిఅర్ వినడం లేదని ఆయన మీడియా ప్రతినిధులతో అన్నారు. కాంగ్రెసు అధిష్టానం నుంచి స్పష్టమైన ప్రకటన వచ్చే వరకు దీక్ష కొనసాగుతుందని కెసిఆర్ మొండికేస్తున్నట్లు ఆయన తెలిపారు.

తెలంగాణ ఏర్పాటుకు శాసనభలో తీర్మానం పెట్టే విషయంలో ముఖ్యమంత్రి కె. రోశయ్య అనుసరిస్తున్న వైఖరిని ఆయన తప్పు పట్టారు. తాము జై తెలంగాణ నినాదాలు చేస్తుంటే కాంగ్రెసులోని ఆంధ్రా శాసనసభ్యులు జై ఆంధ్ర నినాదాలు చేశారని, తెలంగాణ శాసనభ్యులు ఏమైనా అంటే పార్టీ క్రమశిక్షణ ఉల్లంఘన అంటారని ఆయన అన్నారు. ఆంధ్రా శాసనసభ్యులకు వర్తించని క్రమశిక్షణ తెలంగాణ కాంగ్రెసు శాసనసభ్యులకే ఎందుకు వర్తిస్తుందని ఆయన ప్రశ్నించారు.

ఆంధ్రా కాంగ్రెసు శాసనసభ్యులు అహంకారంతో వ్యవహరిస్తుంటే తెలంగాణ కాంగ్రెసు శాసనసభ్యులు దాసోహం అంటున్నారని ఆయన వ్యాఖ్యానించారు. తెలంగాణ కాంగ్రెసు శాసనసభ్యులు ఇప్పటికైనా పౌరుషం ప్రదర్శించాలని, తెలంగాణ కాంగ్రెసు నాయకులు తలుచుకుంటే ముఖ్యమంత్రి రోశయ్య ప్రభుత్వం కూలిపోతుందని ఆయన అన్నారు. శాసనసభలో తెలంగాణ రాష్ట్ర ఏర్పాటుకు తెలంగాణ కాంగ్రెసు శాసనసభ్యులు ఒత్తిడి తేవాలని ఆయన కోరారు.