తెలంగాణ: ఆంధ్రా, రాయలసీమల్లో ఆందోళనలు

హైదరాబాద్: తెలంగాణ రాష్ట్ర ఏర్పాటుకు కేంద్ర ప్రభుత్వం తీసుకున్న నిర్ణయంపై ఆంధ్రా, రాయలసీమల్లో ఆగ్రహం వ్యక్తమవుతోంది. ఆ ప్రాంతాలకు చెందిన ప్రజాప్రతినిధులు రాజీనామాలు చేయడం ఒక్కటి కాగా, ఆ ప్రాంతాల్లో ఆందోళనలు తలెత్తడం మరోటి. విశాఖపట్నంలో విద్యార్థులు ర్యాలీ నిర్వహించారు. సమైక్యాంధ్రనే కావాలంటూ నినాదాలు చేశారు. ఆర్టీసి బస్సులపై దాడి చేశారు. విశాఖపట్నంలోని ఆంధ్ర విశ్వవిద్యాలయంలో ఆందోళన పెల్లుబుకింది. దీంతో యూనివర్శిటీ గేట్లను మూసేశారు.దీంతో పరిస్థితి ఉద్రిక్తంగా మారింది. రాయలసీమలోని శ్రీకృష్ణ దేవరాయంధ్ర విశ్వవిద్యాలయంలో విద్యార్థులు ఆందోళనలకు దిగారు.

విజయవాడలో ప్రదర్శన నిర్వహించారు. విజయవాడ కార్పొరేటర్లు రాజీనామాలు చేశారు. పెడన కౌన్సలర్లు కూడా రాజీనామా చేశారు. తెలంగాణకు వచ్చే బస్సులను లక్ష్యంగా చేసుకుని విధ్వంసాలు జరుగుతున్నాయి. గుత్తిలో మూడు ఆర్టీసి బస్సులకు నిప్పు పెట్టారు. యోగి వేమన విశ్వవిద్యాలయంలో కెసిఆర్ దిష్టిబొమ్మను దగ్ధం చేశారు. రేపు రాయలసీమ బంద్ కు ఆ ప్రాంత శాసనసభ్యులు పిలుపునిచ్చారు. ఆంధ్ర బంద్ పిలుపుకు ఆ ప్రాంత శాసనసభ్యులు పిలుపునిచ్చారు. కడప మేయర్ రవీంద్రనాథ్ రెడ్డి కడప జిల్లా బంద్ కు పిలుపునిచ్చారు.