తెలంగాణపై ఆంధ్రా యూనివర్సిటీలో ఆగ్రహావేశాలు

విశాఖపట్నం: ప్రత్యేక తెలంగాణ రాష్ట్రం కోసం తీర్మానానికి కేంద్ర ప్రభుత్వం గ్రీన్ సిగ్నల్ ఇవ్వడంపై ఆంధ్రా యూనివర్సిటీ విద్యార్ధులు ఆగ్రహం వ్యక్తం చేస్తున్నారు. గత కొన్ని రోజులుగా ఈ విశ్వవిద్యాలయ విద్యార్ధులు సమైక్యాంధ్ర కోసం ఆందోళన చేస్తున్న విషయం తెలిసిందే. ఉత్తరాంధ్రకు చెందిన అన్ని పార్టీల ఎమ్మెల్యేలు, ఎంపీలు రాజీనామా చేయాలని విద్యార్ధి నాయకులు డిమాండ్ చేస్తున్నారు.

'తెలంగాణ' తీర్మానం నిర్ణయంతో తెలంగాణేతర జిల్లాల్లో ఉద్రిక్తత వాతావరణం నెలకొంది. అనంతపురంలో 15 మంది విద్యార్థులను పోలీసులు అరెస్టు చేశారు. ఏయూ, ఎస్కేయూ, ఎన్‌యూ, వేమన విశ్వవిద్యాలయ విద్యార్థులు ఆందోళనకు దిగడంతో ఆంధ్రా, రాయలసీమ ప్రాంతాలు అట్టుడుకుతున్నాయి. ఇదిలా ఉండగా, రేపు రాయలసీమ బంద్‌కు విద్యార్థులు పిలుపు ఇచ్చిన నేపథ్యంలో ప్రభుత్వం అదనపు బలగాలను రాయలసీమకు తరలిస్తోంది.