దాడుల సమాచారంతో లగడపాటి ఆస్తులకు భారీ భద్రత

హైదరాబాద్: సమైక్యాంధ్ర కోసం ఉద్యమిస్తున్న విజయవాడ ఎంపీ లగడపాటి రాజగోపాల్ కు చెందిన ల్యాంకోహిల్స్ కు పోలీసులు రక్షణ వలయం ఏర్పాటు చేయవలసి వచ్చింది. ప్రతిష్టాత్మకమైన హైటెక్ సిటీ సమీపంలో వందెకరాల స్ధలంలో రాజగోపాల్ సంస్ధ ల్యాంకో హిల్స్ పేరిట అత్యంత విలాసవంతమైన అపార్ట్ మెంట్లను నిర్మించింది. ఈ ప్రాజెక్టు విలువ దాదాపు వెయ్యికోట్లు ఉంటుంది. ఉస్మానియా విశ్వవిద్యాలయానికి చెందిన తెలంగాణ వాద విద్యార్ధులు ల్యాంకోహిల్స్ పై దాడి చేస్తారన్న సమాచారం అందడంతో శనివారంఅ పోలీసు అప్రమత్తమయ్యారు. భారీ బందోబస్తు ఏర్పాటు చేశారు.

ఉస్మానియా విద్యార్ధులు ఉదయం పదిగంటల సమయంలో ల్యాంకో హిల్స్ వైపు వస్తున్నారనే సమాచారం రావడంతో పోలీసులు ఆ ప్రాంతాన్ని తమ అధినంలోకి తీసుకున్నారు. రాజేంద్రనగర్ ఎసిపి సర్వేశ్వర్ రెడ్డి నేతృత్వంలో నలుగురు సిఐలు, పదిమంది ఎస్సైలు, 60 మంది కానిస్టేబుళ్ళు ఆ ప్రాంతానికి చేరుకున్నారు. ఖాజాగుడా-ల్యాంకోహిల్స్-మణికొండ మార్గాన్ని దిగ్బంధం చేశారు. ల్యాంకో హిల్స్ వద్ద ఆరు పికెట్లు ఏర్పాటు చేసినట్టు ఇన్ స్పెక్టర్ గంగారెడ్డి చెప్పారు.