ఆంధ్రా యూనివర్సిటీ పరిధిలో పరీక్షలు వాయిదా

విశాఖపట్నం: సమైక్య ఆంధ్ర ఉద్యమం కారణంగా ఉద్రిక్త పరిస్ధితుల దృష్ట్యా ఆంధ్ర విశ్వవిద్యాలయంలో నిర్వహించాల్సిన పరీక్షలన్నీ వాయిదాపడ్డాయి. ఆయా పరీక్షలను తిరిగి నిర్వహించే తేదీలను తరువాత ప్రకటిస్తామని అధికారులు చెప్పారు. సోమ, మంగళవారాల్లో జరగాల్సిన పరీక్షలను కూడా వాయిదా వేశారు. ఈ నెల 11, 12 తేదీల్లో జరగాల్సిన బీఏ, బీకాం, బీఎస్సీ చివరి సంవత్సర పరీక్షలను ఏయూ దూరవిద్యా కేంద్రం వాయిదా వేసిన విషయం తెలిసిందే.

16 నుంచి 26వతేదీ వరకు నిర్వహించాల్సిన బీఏ, బీకాం, బీఎస్సీ రెండో సంవత్సరం పరీక్షలనూ రద్దు చేసినట్టు ఏయూ దూర విద్యా కేంద్రం సంచాలకులు హృషికేశవరావు తెలిపారు. 28వ తేదీ నుంచి జరిగే మొదటి సంవత్సరం విద్యార్థుల పరీక్షలపై నిర్ణయం తీసుకోలేదని, అప్పటి పరిస్థితి బట్టి ఆలోచిస్తామని చెప్పారు. ఈ నెల 15, 16 తేదీల్లో జరిగే ఎంబీఏ మొదటి సెమిస్టర్‌, ఎంకాం రెండో సెమిస్టర్‌, ఎల్‌ఎల్‌బీ అయిదో సెమిస్టర్‌ పరీక్షలనూ వాయిదా వేసినట్లు ఏయూ పరీక్షల నియంత్రణ అధికారి సామ్రాజ్యలక్ష్మి తెలిపారు.