తెలంగాణపై తల పట్టుకున్న హై కమాండ్

న్యూఢిల్లీ: తెలంగాణ అంశంపై కాంగ్రెసు అధిష్టానం తల పట్టుకుంది. తెలంగాణ రాష్ట్ర ఏర్పాటు ప్రక్రియకు పార్టీ రాయలసీమ, కోస్తాంధ్ర పార్లమెంటు సభ్యులతో పాటు శాసనసభ్యులు, ఎమ్మెల్సీలు తీవ్రంగా వ్యతిరేకత వ్యక్తం చేస్తుండడంతో ముందుకు కదల లేని, వెనక్కి రాలేని పరిస్థితిలో పార్టీ అధిష్టానం పడింది. అందరికీ ఆమోదయోగ్యమైన ప్రకటన చేస్తామని పార్టీ అధిష్టానం సీమాంధ్ర ఎంపీలకు హామీ ఇస్తూనే ఉన్నది. కోహెన్ హాగన్ నుంచి ప్రధాని వచ్చిన తర్వాత సమస్యను పరిష్కరింస్తామని కూడా కేంద్ర మంత్రులు ప్రణబ్ ముఖర్జీ వంటి వారు చెబుతూ వచ్చారు. దీంతో ప్రధాని నివాసంలో సోమవారం రాత్రి పార్టీ కోర్ కమిటీ సమావేశం జరిగింది. తెలంగాణ అంశంపై కోర్ కమిటీ సుదీర్ఘంగా రెండు గంటల పాటు చర్చించింది. ఈ సమావేశంలో ఒక నిర్ణయానికి రాలేకపోయారు. తిరిగి మంగళవారం సమావేశం కావాలని నిర్ణయించుకున్నారు.

కాగా, తెలంగాణ అంశంపై మంగళవారం సాయంత్రం అధిష్టానం నుంచి ఒక ప్రకటన రాగలదని భావిస్తున్నారు. రాజ్యసభ సమావేశాలు ముగిసిన తర్వాత మంగళవారం తెలంగాణపై ఒక ప్రకటన చేయవచ్చుననే వార్తలు వచ్చాయి. కాగా, సోమవారం కోర్ కమిటీ సమావేశం తర్వాత మళ్లీ కేంద్ర మంత్రులు ప్రణబ్ ముఖర్జీ, వీరప్ప మొయిలీ 15 నిమిషాల పాటు చర్చలు జరిపారు. అనంతరం వారిద్దరు కలిసి కాంగ్రెసు అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్ తో మాట్లాడారు. రోజులు గడుస్తున్న కొద్దీ సీమాంధ్ర ఎంపీల్లో అసహనం పెరుగుతోంది. అధిష్టానం నుంచి తమకు అనుకూలమైన నిర్ణయం రాకపోతే రాజీనామాలు చేయడం తప్ప మరో మార్గం లేదనేంతగా వారు అసహనానికి గురవుతున్నారు.