పోలీసులతో లగడపాటి వాదులాట

హైదరాబాద్: నిజాం వైద్య విజ్ఞాన సంస్థ (నిమ్స్)లో చికిత్స పొందుతున్న కాంగ్రెసు పార్లమెంటు సభ్యుడు లగడపాటి రాజగోపాల్ మంగళవారం పోలీసులతో వివాదానికి దిగారు. లగడపాటి వద్ద సెల్ ఫోన్ ను స్వాధీనం చేసుకునేందుకు పోలీసులు ప్రయత్నించారు. సెల్ ఫోన్ ను ఇవ్వడానికి ఆయన నిరాకరించారు. ఈ సమయంలో పోలీసులతో ఆయన వాదానికి దిగారు. మంగళవారం మధ్యాహ్నం రెండు గంటల పాటు మీడియాతో మాట్లాడేందుకు తనకు అనుమతి ఇవ్వాలని లగడపాటి ప్రభుత్వాన్ని కోరారు.

తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చికిత్స పొందుతున్నప్పుడు ఆయనను పరామర్శించేందుకు విజిటర్స్ ను అనుమతించారని, లగడపాటిని పరామర్శించేందుకు వస్తున్నవారిని అనుమతించడం లేదని మాజీ శానససభ్యుడు అడుసుమల్లి జయప్రకాష్ విమర్శించారు. లగడపాటిని పరామర్శించేందుకు వచ్చే వారిని అనుమతించాలని ఆయన డిమాండ్ చేశారు.