భయపెడుతున్నారంటూ కెసిఆర్ పై ఆంధ్రలో కేసు

నందిగామ: ప్రజలను భయపెట్టేలా వ్యాఖ్యలు చేస్తున్న తెలంగాణా రాష్ట్ర సమితి (టీఆర్‌ఎస్‌) అధ్యక్షుడు కే చంద్రశేఖరరావుపై కోర్టు ఆదేశాల మేరకు కేసు నమోదు చేసినట్లు ఎస్సై ఎస్‌వీవీఎస్‌ మూర్తి తెలిపారు. గురువారం ఆయన విలేకరులతో మాట్లాడుతూ, 'అణు విస్ఫోటనాలు' జరుగుతాయని ప్రజలను భయభ్రాంతులకు గురిచేసే విధంగా వ్యాఖ్యలు చేసిన కేసీఆర్‌పై చర్యలు తీసుకోవాలని కోరుతూ స్థానిక బార్‌ అసోసియేషన్‌ సభ్యులు కోర్టులో పిటిషన్‌ దాఖలు చేశారని తెలిపారు.

దీనిపై విచారణ జరపవలసిందిగా పోలీసులను కోర్టు ఆదేశించిందన్నారు. ఈమేరకు కేసు నమోదుచేసి, విచారణ ప్రారంభించామని పేర్కొన్నారు. కేసీఆర్‌ వ్యాఖ్యలపై పత్రికల్లో ప్రచురితమైన వార్తల కటింగ్‌లను బార్‌ అసోసియేషన్‌ సభ్యుడు నండ్రు శ్రీరామమూర్తి న్యాయస్థానానికి సమర్పించారని, వీటి ఆధారంగా విచారణ నిర్వహిస్తున్నట్లు ఎస్సై తెలిపారు.