ఎపి గవర్నర్ గా నరసింహన్ ప్రమాణం

హైదరాబాద్: ఆంధ్రప్రదేశ్ ఇంచార్జీ గవర్నర్ గా ఛత్తీస్ ఘడ్ గవర్నర్ ఇఎస్ఎల్ నరసింహన్ సోమవారం ఉదయం ప్రమాణ స్వీకారం చేశారు. ఆయన చేత హైకోర్టు ప్రధాన న్యాయమూర్తి ఉదయం తొమ్మిదిన్నర గంటలకు రాజభవన్ లోని దర్బార్ హాల్ లో ప్రమాణ స్వీకారం చేయించారు. సెక్స్ కుంభకోణంలో ఇరుకున్న ఎన్డీ తివారీ గవర్నర్ పదవికి రాజీనామా చేసిన విషయం తెలిసిందే. ఆయన ఆదివారంనాడే హైదరాబాద్ నుంచి తిరిగి వెళ్లిపోయారు. ఆయన స్థానంలో నరసింహన్ గవర్నర్ గా బాధ్యతలు స్వీకరించారు. ఈ ప్రమాణ స్వీకారోత్సవానికి ముఖ్యమంత్రి రోశయ్యతో పాటు ఇతర పార్టీల నాయకులు హాజరయ్యారు.

నరసింహన్ ఆదివారం రాత్రి హైదరాబాద్ వచ్చారు. ఆయనకు ముఖ్యమత్రి కె. రోశయ్య హైదరాబాదులోని బేగంపేట విమానాశ్రయంలో స్వాగతం చెప్పారు. తివారీ ఆదివారంనాడే రాజభనవ్ ను ఖాళీ చేశారు. నరసింహన్ ప్రమాణ స్వీకారోత్సవానికి రాష్ట్ర ప్రభుత్వ ప్రధాన కార్యదర్శి రమాకాంత్ రెడ్డి, మంత్రులు, శాసనసభ్యులు కూడా హాజరయ్యారు.