తెలంగాణ ఇవ్వాల్సిందే: నారాయణమూర్తి

వరంగల్: తెలంగాణ రాష్ట్రం ఇవ్వాల్సిందేనని ప్రముఖ సినీ నటుడు ఆర్ నారాయణ మూర్తి అన్నారు. తెలంగాణకు తన పూర్తి మద్దతు ఉంటుందని ఆయన చెప్పారు. కాకతీయ విశ్వవిద్యాలయంలో నిరాహార దీక్షలు చేస్తున్న విద్యార్థులను ఆయన బుధవారం పరామర్శించారు. వారికి మద్దతు తెలిపారు. తెలంగాణకు మద్దతుగా ఆయన ఆవేశపూరితంగా తెలంగాణ గేయం ఆలపించారు. సమైక్యాంధ్ర ఉద్యమం సరైంది కాదని ఆయన అన్నారు. తెలంగాణ ఉద్యమానికి తన మద్దతు ఉంటుందని ఆయన చెప్పారు.

కాగా, బంద్ సందర్భంగా వరంగల్లు పోటెత్తింది. ప్రదర్శనలు, ర్యాలీలు జరిగాయి. మర్వాడీలు భార్యాపిల్లలతో వేలాది మంది వీధుల్లోకి వచ్చి తెలంగాణకు మద్దతుగా ప్రదర్శన నిర్వహించారు. అన్ని వర్గాల వారు వీధుల్లోకి వచ్చి ర్యాలీలు చేశారు. వ్యాపార సంస్థలు, సినిమా హాళ్లు, విద్యా సంస్థలు మూసేశారు. విద్యార్థులు కూడా వరంగల్లులో భారీ ప్రదర్శన నిర్వహించారు. విద్యార్థినులు తెలంగాణకు మద్దతుగా మానవ హారం నిర్మించారు.