తెలంగాణలో బంద్ ప్రభావం ఎక్కువే

హైదరాబాద్: తెలంగాణ రాష్ట్ర ఏర్పాటుకు నిర్దిష్ట కాల పరిమితిని డిమాండ్ చేస్తూ రాజకీయ పార్టీలు, ప్రజా సంఘాల సంయుక్త కార్యాచరణ కమిటీ (జెఎసి) ఇచ్చిన పిలువు మేరకు బుధవారం తెలంగాణ అంతటా బంద్ జరుగుతోంది. తెలంగాణలోని ఆర్టీసి బస్సులు ఎక్కడికక్కడే నిలిచిపోయాయి. కోస్తాంధ్ర, రాయలసీమ ప్రాంతాల నుంచి తెలంగాణకు బస్సులను నిలిపేశారు. తెలంగాణలోని ప్రధాన రహదార్లపై ఆందోళనకారులు బైఠాయించి రాస్తారోకోలు నిర్వహిస్తున్నారు. బంద్ సందర్భంగా తెలంగాణలో భారీ బలగాలను దించారు. తెలంగాణ అంతటా 144 సెక్షన్ విధించారు. హైదరాబాదులో బుధవారం నుంచి వారం రోజుల పాటు 144 సెక్షన్ విధించారు.

ఖమ్మ జిల్లాలోని మధిరలో మహిళలు రిలే నిరాహార దీక్షలకు దిగారు. సికింద్రాబాద్ నుంచి వివిధ ప్రాంతాలకు వెళ్లే 165 రైళ్లను రద్దు చేశారు. వరంగల్ జిల్లాలో ఆందోళనకారులు సంపర్క్, మిలీనియం ఎక్స్ ప్రెస్ రైళ్లను నిలిపేశారు. నిజామాబాద్ లో ఉదయం ఐదున్నర గంటల నుంచే ఆందోళనకారులు ర్యాలీలు ప్రారంభించారు. వరంగల్ జిల్లా జనగామ జైలులో ఖైదీలు నిరాహార దీక్షలు చేపట్టారు. మెదక్ జిల్లా జోగిపేటలో ఆందోళనకారులు పొట్టి శ్రీరాములు విగ్రహాన్ని ధ్వంసం చేశారు.

హైదరాబాద్, రంగారెడ్డి జిల్లాల్లో 3800 బస్సులు, మిగతా 8 తెలంగాణ జిల్లాల్లో 5200 బస్సులు నిలిచిపోయాయి. విజయవాడ, హైదరాబాద్ జాతీయ రహదారిపై చెట్లు నరికి రోడ్డుకు అడ్డంగా వేశారు. తెలంగాణ అంతటా ప్రజాజీవనం స్తంభించింది. విద్యాసంస్థలు, వాణిజ్య సంస్థలు మూతపడ్డాయి.