తెలంగాణపై వైయస్ ప్రకటనే శిరోధార్యం: లగడపాటి రాజగోపాల్

విజయవాడ: తెలంగాణపై ఎన్నికలకు ముందు దివంగత ముఖ్యమంత్రి వైయస్ రాజశేఖర రెడ్డి ప్రకటనకు కట్టుబడి ఉండాలని కాంగ్రెసు విజయవాడ పార్లమెంటు సభ్యడు లగడపాటి రాజగోపాల్ అన్నారు. తెలంగాణ సమస్యపై ఆయన బుధవారం కేంద్ర హోం మంత్రి పి. చిదంబరానికి ఓ లేఖ రాశారు. ఎన్నికలకు ముందు వైయస్ రాజశేఖర రెడ్డి శాసనసభలో చేసిన ప్రకటనను ఆయన గుర్తు చేశారు.

ప్రత్యేక తెలంగాణకు సంబంధించి వైయస్ ఏర్పాటు చేసిన కమిటీని పునరుద్ధరించాలని ఆయన కోరారు. తెలంగాణ సమస్యను రాష్ట్రమే పరిష్కరించుకోవాలని ఆయన సూచించారు. సమస్య పరిష్కారానికి ఇప్పుడే కేంద్రం జోక్యం చేసుకోకూడదని ఆయన అన్నారు. రాష్ట్రం పరిష్కారం చేసుకోలేని స్థితిలో కేంద్ర ప్రభుత్వం జోక్యం చేసుకోవాలని ఆయన సూచించారు. ప్రస్తుత ముఖ్యమంత్రి కె. రోశయ్య అధ్యక్షతన వైయస్ రాజేశేఖర రెడ్డి తెలంగాణపై ఒక కమిటీ వేశారు. అయితే ఈ కమిటీలో చేరడానికి తెలంగాణ రాష్ట్ర సమితి (తెరాస) ఇష్టపడలేదు. ఆ కమిటీని పునరుద్ధరిస్తామని రోశయ్య చెప్పారు. అయితే రాజకీయ పార్టీలు అందుకు అంగీకరించలేదు.