తెలంగాణకు డెడ్ లైన్ లేదు: సింఘ్వీ

న్యూఢిల్లీ: తెలంగాణ రాష్ట్ర ఏర్పాటుకు డెడ్ లైన్ ఏదీ లేదని ఎఐసిసి అధికార ప్రతినిధి అభిషేక్ మను సింఘ్వీ స్పష్టం చేశారు. రేపటి చర్చలు ప్రారంరభం మాత్రమేనని, అటువంటి చర్చలు, ప్రక్రియలు చాలా సాగుతాయని, అందువల్ల స్పష్టమైన కాల పరిమితిని చెప్పలేమని ఆయన సోమవారం సాయంత్రం మీడియా ప్రతినిధుల సమావేశంలో చెప్పారు. ఏకాభిప్రాయ సాధన కోసమే రేపటి హోం మంత్రిత్వ శాఖ సమావేశం జరుగుతోందని, ఇదే ప్రారంభమూ అంతమూ కాదని ఆయన అన్నారు.

చర్చల ద్వారా సామరస్యపూర్వక ఫలితం సాధించాలనేది తమ వైఖరి అని ఆయన చెప్పారు. చర్చల ప్రక్రియ పూర్తై ఏకాభిప్రాయం సాధించడానికి ఎంత సమయం పడుతుందనేది చెప్పలేమని ఆయన అన్నారు. రాష్ట్ర విభజన, చర్చల ప్రక్రియ కేవలం ఆంధ్రప్రదేశ్ కు మాత్రమే పరిమితమని ఆయన చెప్పారు. తాము గాలిలో వచ్చే వార్తలను నమ్మలేమని ఆయన అన్నారు.

తెలంగాణకు మద్దతిచ్చేందుకు సిపిఐ ప్రధాన కార్యదర్శి ఎబి బర్దన్ నిర్ణయించుకున్నారు. ఈ మేరకు ఆయన తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు హామీ ఇచ్చారు. ముఖ్యమంత్రి కె. రోశయ్య ప్రధాని మన్మోహన్ సింగ్ తో భేటీ అయ్యారు.