మహారాష్ట్రలో టెంపో బోల్తా: 16 మంది మృతి

ముంబై: మహారాష్ట్రలోని షోలాపూర్ సమీపంలో టెంపో బోల్తా పడడంతో 16 మంది మరణించార. మరో 28 మంది గాయపడ్డారు. ఈ ప్రమాదం మంగళవారం తెల్లవారు జామున జరిగినట్లు పోలీసులు తెలిపారు. మృతులంతా కూలీలేనని తెలుస్తోంది.మంగళవారం తెల్లవారు జామున ఒంటి గంటన్నర ప్రాంతంలో టెంపో డ్రైవర్ నియంత్రణ కోల్పోవడంతో అదుపు తప్పి ప్రమాదం సంభవించినట్లు పోలీసులు తెలిపారు.

టెంపో బోల్తా పడడంతో చాలా మంది ధాన్యం బస్తాల కింద చిక్కుకుపోయారు. దాంతో ప్రమాదం నుంచి వారు తప్పించుకోలేకపోయారు. మృతుల్లో చాలా మంది కర్నాటకలోని అఫ్జల్పూర్, గంగపూర్ ప్రాతాలకు చెందినవారని పోలీసులు తెలిపారు. ముంబైకి వంద కిలో మీటర్ల దూరంలో గల రాయగఢ్ జిల్లాలోని పెన్ లో పనిచేయడానికి వారు వెళ్తున్న సందర్భంగా ప్రమాదానికి గురయ్యారు. ప్రమాద స్థలికి స్థానికులు పెద్ద యెత్తున చేరుకుని సహాయక చర్యలు చేపట్టారు.

మృతుల్లో ఐదుగురు పురుషులు, ఐదుగురు మహిళలు, ముగ్గురు బాలురు, ముగ్గురు బాలికలున్నారు. బాధితుల కుటుంబాలను సంప్రదించేందుకు మహారాష్ట్ర పోలీసులు కర్నాటక పోలీసులతో మాట్లాడుతున్నారు. గాయపడినవారిలో 18 మంది పరిస్థితి ఆందోళనకరంగా ఉన్నట్లు తెలుస్తోంది. టెంపో డ్రైవర్ పరారీలో ఉన్నాడు.