చిదంబరం మమ్మల్ని అవమానించారు: నాగం జనార్దన్ రెడ్డి

న్యూఢిల్లీ: కేంద్ర హోం మంత్రి పి. చిదంబరం తమను అవమానించారని తెలుగుదేశం పార్టీ తెలంగాణ నాయకుడు నాగం జనార్దన్ రెడ్డి విమర్శించారు. తెలంగాణకు చెందిన తెలుగుదేశం నాయకులను కలుసుకోవడానికి చిదంబరం నిరాకరించడంపై ఆయన బుధవారం మీడియా ప్రతినిధుల సమావేశంలో తీవ్రంగా ధ్వజమెత్తారు. తెలుగుదేశం తెలంగాణ ప్రజాప్రతినిధుల అభిప్రాయాలను వినడానికి చిదంబరం ఇష్టపడడం లేదని, తెలంగాణ నాయకులను ఆ రకంగా చిదంబరం అవమానిస్తున్నారని ఆయన అన్నారు. చిదంబరం తమ పట్ల వివక్ష ప్రదర్శిస్తున్నారని ఆయన అన్నారు.

తెలంగాణ రాష్ట్ర ఏర్పాటుపై కేంద్ర ప్రభుత్వం ఎందుకు జాప్యం చేస్తోందో అర్థం కావడం లేదని ఆయన అన్నారు. తెలంగాణ రాష్ట్ర ఏర్పాటుకు తెలంగాణలో ఏకాభిప్రాయం ఉందని ఆయన అన్నారు. తెలంగాణ రాష్ట్ర ఏర్పాటుపై ఇంకా జాప్యం చేస్తే రాష్ట్రంలోని రెండు ప్రాంతాల మధ్య మరింతగా వైషమ్యాలు పెరిగే ప్రమాదం ఉందని ఆయన అన్నారు. తెలంగాణ ఏర్పాటుపై స్పష్టమైన ప్రకటన చేసి కాలపరిమితి విధించాలని ఆయన డిమాండ్ చేశారు. కేంద్రం ప్రభుత్వం గానీ కాంగ్రెసు పార్టీ గానీ తెలంగాణపై స్పష్టమైన వైఖరి ప్రకటించకపోవడాన్ని ఆయన తప్పు పట్టారు. సంప్రదింపుల పేరుతో కాలయాపన చేయడం సరి కాదని ఆయన అన్నారు.