ఎన్టీఆర్ 'అదుర్స్' థియేటర్స్ పై టీఅర్ఎస్ దాడులు

హైదరాబాద్: జూనియర్‌ ఎన్టీఆర్‌ నటించిన అదుర్స్‌ చిత్ర ప్రదర్శన ప్రారంభం కావడానికి ముందురోజే టిఆర్‌ఎస్‌ కార్యకర్తలు కదం తొక్కారు. ఈ చిత్రం రిలీజవుతున్న థియేటర్లపై దాడులకు సిద్ధం అయ్యారు. సరూర్‌నగర్‌లో అదుర్స్‌ విడుదల అవుతున్న ఇంద్ర, నాగేంద్ర థియేటర్లపై టిఆర్‌ఎస్‌ కార్యకర్తలు దాడి చేసి ఫర్నీచర్‌ ధ్వంసం చేశారు. అనంతరం పోలీసులు దాడిచేసిన వారిని అదుపులోకి తీసుకున్నట్లు తెలుస్తోంది.

ఓపక్క చిత్ర ప్రదర్శనకు ఎలాంటి ఆటంకాలు లేకుండా కట్టుదిట్టమైన భద్రత ఏర్పాటు చేస్తామని హైకోర్టుకు డిజిపి చెబుతుండగానే, ఇక్కడ ఆందోళనకారులు ఈ విధంగా థియేటర్లపై దాడులకు దిగుతుండడంతో పోలీసు యంత్రాంగం అప్రమత్తమయింది.జూనియర్ ఎన్టీఆర్ నటించిన అదుర్స్ సినిమా విడుదలకు రాష్ట్ర హైకోర్టు పచ్చ జెండా ఊపింది. అదుర్స్ సినిమా విడుదలను అడ్డుకుంటామని కొన్ని సంఘాల నాయకులు హెచ్చరించిన నేపథ్యంలో చిత్ర నిర్మాతలు హైకోర్టును ఆశ్రయించారు. ఈ పిటిషన్ లో తెలంగాణ జన జాగృతి కన్వీనర్ కవిత, తెలంగాణ విద్యార్థి సంఘాల జెఎసి నేతలు, రాజకీయ, ప్రజా సంఘాల జెఎసి కన్వీనర్ కోదండరామ్ లను ప్రతివాదులుగా చేర్చారు. ఈ పిటిషన్ పై హైకోర్టు డిజిపి గిరీష్ కుమార్ ను నివేదిక సమర్పించాలని హైకోర్టు ఆదేశించింది. ఈ మేరకు డిజిపి నివేదిక సమర్పించారు.