తెలంగాణ జెఎసిలో విభేదాలు

హైదరాబాద్: రాజకీయ, ప్రజా సంఘాల సంయుక్త కార్యాచరణ కమిటీ (జెఎసి)లో విభేదాలు పొడసూపాయి. తెలంగాణ రాష్ట్ర సాధన కోసం భవిష్యత్తు వ్వూహరచన కోసం తెలంగాణ జెఎసి మంగళవారం సమావేశమైంది. తెలంగాణపై కేంద్ర ప్రభుత్వం ఏమీ తేల్చకపోవడంతో ఉద్యమ ఉధృతికి అనుసరించాల్సిన వ్యూహంపై కార్యాచరణను రూపొందించుకోవడానికి ఈ సమావేశం ఏర్పాటైంది. ఈ సమావేశంలో మాదిగ రిజర్వేషన్ పోరాట సమితి (ఎమ్మార్పీయస్) నేత మందకృష్ణ మాదిగ చేసిన వ్యాఖ్యలు వివాదానికి దారి తీశాయి. తెలంగాణ రాష్ట్ర ఏర్పాటును తెలుగుదేశం, కాంగ్రెసు పార్టీలే అడ్డుకుంటున్నాయని ఆయన విమర్శించారు.

తెలుగుదేశం, కాంగ్రెసు పార్టీల ప్రజాప్రతినిధులు రాజీనామాలు సమర్పించి వాటిని ఆమోదింపజేసుకుని ఉద్యమంలోకి రావాలని ఆయన అభిప్రాయపడ్డారు. దీనికి తెలుగుదేశం నాయకులతో పాటు కాంగ్రెసు నాయకులు తీవ్ర అభ్యంతరం తెలిపారు. కాంగ్రెసు సీనియర్ శాసనసభ్యుడు ఆర్ దామోదర్ రెడ్డికి, మందకృష్ణకు మధ్య వాగ్వివాదం చెలరేగినట్లు తెలుస్తోంది. మందకృష్ణ మాదిగ తీరును తెలుగుదేశం నాయకుడు నాగం జనార్దన్ రెడ్డి కూడా తీవ్రంగా వ్యతిరేకించినట్లు సమాచారం. మందకృష్ణ మాదిగ పిసిసి అధ్యక్షుడు డి. శ్రీనివాస్ ను, తెలుగుదేశం పార్టీ అధ్యక్షుడు నారా చంద్రబాబు నాయుడిని తప్పు పట్టారు. వారికి ఇతరులు సర్ది చెప్పడంతో పరిస్థితి సద్దుమణిగింది. రాజీనామాల ఆమోదానికి స్పీకర్ పై ఒత్తిడి తేవాలని జెఎసిలో నిర్ణయం తీసుకునే అవకాశం ఉంది.