రాజీనామాల ఆమోదానికి పట్టు: కె చంద్రశేఖర రావు

హైదరాబాద్: తెలంగాణ రాష్ట్ర ఏర్పాటుకు నిర్దిష్టమైన కాల పరిమితిని ప్రకటించాలని డిమాండ్ చేస్తూ చేసిన రాజీనామాల ఆమోదానికి స్పీకర్ పై ఒత్తిడి తెస్తామని తెలంగాణ రాష్ట్ర సమితి (తెరాస) అధ్యక్షుడు కె చంద్రశేఖర రావు చెప్పారు. పార్టీ పోలిట్ బ్యూరో సమావేశానంతరం ఆయన మంగళవారం మీడియా ప్రతినిధులతో మాట్లాడారు. రాజీనామాలను ఆమోదించాలని డిమాండ్ చేస్తూ ఈ నెల 18వ తేదీన స్పీకర్ చేంబర్ వద్ద బైఠాయించాలని నిర్ణయం తీసుకున్నట్లు ఆయన తెలిపారు. తాము ఇద్దరు పార్లమెంటు సభ్యులం, పది మంది శాసనసభ్యులు, ఒక ఎమ్మెల్సీ రాజీనామాలకు కట్టుబడి ఉన్నామని ఆయన చెప్పారు.

సంక్రాంతి పర్వదినం తర్వాత పార్టీ నాయకులంతా జిల్లాల్లో పర్యటించి ఉద్యమాన్ని ఉధృతం చేయాలని నిర్ణయించినట్లు ఆయన తెలిపారు. ఆత్మహత్యలు చేసుకోవద్దని విద్యార్థులను కోరుతూ మరో తీర్మానం చేసినట్లు ఆయన చెప్పారు. ఉద్వేగానికి, మనస్తాపానికి గురై ఆత్మహత్యలు చేసుకోవద్దని ఆయన విద్యార్థులను కోరారు. పోరాటంలో భాగస్వాములు కావాలి తప్ప ప్రాణాలు తీసుకోవద్దని ఆయన అన్నారు. ప్రాణాలు ఇవ్వడానికి తాము ముందు వరుసలో ఉంటామని, విద్యార్థులు ఆత్మహత్యలు చేసుకోవాల్సిన అవసరం లేదని ఆయన అన్నారు. తమ ప్రతిపాదనలను రాజకీయ, ప్రజా సంఘాల జెఎసి ముందుంచుతామని ఆయన చెప్పారు. ఈ మీడియా ప్రతినిధుల సమావేశంలో పార్లమెంటు సభ్యురాలు విజయశాంతి కూడా పాల్గొన్నారు.