జెఎసి నిర్ణయాలకు కట్టుబడ్తాం: నాగం జనార్దన్ రెడ్డి

హైదరాబాద్: తెలంగాణపై తాము రాజకీయ, ప్రజా సంఘాల సంయుక్త కార్యాచరణ సమితి (జెఎసి) నిర్ణయాలకు కట్టుబడి ఉంటామని తెలుగుదేశం పార్టీ తెలంగాణ నేత నాగం జనార్దన్ రెడ్డి చెప్పారు. జెఎసి సమావేశంలో తాము అనుసరించాల్సిన వ్యూహంపై చర్చించేందుకు తెలుగుదేశం తెలంగాణ నేతలు మంగళవారం సమావేశమయ్యారు. ఈ సమావేశానంతరం నాగం జనార్దన్ రెడ్డి మీడియా ప్రతినిధులతో మాట్లాడారు. రాజీనామాలపై తమ ప్రతిపాదనలను జెఎసి ముందుంచుతామని, జెఎసి తీసుకునే నిర్ణయానికి కట్టుబడి ఉంటామని ఆయన చెప్పారు.

ఇంటర్మీడియట్ పరీక్షలు వాయిదా వేయాలని ఆయన ప్రభుత్వాన్ని డిమాండ్ చేశారు. సిలబస్ పూర్తి కాకుండా పరీక్షలు నిర్వహించాలనుకోవడాన్ని జెఎసి సమావేశంలో ప్రస్తావిస్తామని ఆయన చెప్పారు. తెలంగాణ అనుకూల, వ్యతిరేక ఉద్యమాల వల్ల కళాశాలలు సరిగా నడవకపోవడంతో సిలబస్ పూర్తి కాలేదు. అయినప్పటికీ పరీక్షలను వాయిదా వేయబోమని విద్యా శాఖ మంత్రి మాణిక్యవర ప్రసాద్ చెప్పారు.