హైతీలో భారీ భూకంపం కూలిన భవనాలు

వాషింగ్టన్: హైతీలో మంగళవారం భారీ భూకంపం చోటు చేసుకుంది. దేశ రాజధాని పోర్ట్ - ఔ - ప్రిన్స్ లోని అధ్యక్ష భవనంతో పాటు పలు భవనాలు భూకంపం ధాటికి కూలిపోయాయి. భూకంపం రిక్టర్ స్కేల్ పై 7.0గా నమోదైంది. దీవిలోని కమ్యూనికేషన్ వ్యవస్థ ధ్వంసమైంది. ఆ తర్వాత కూడా ప్రకంపనలు చోటు చేసుకుని సునామీ వస్తుందనే భయాందోళనలు కలిగించాయి. ఐక్య రాజ్య సమితి పీస్ కీపర్ భవనం, ఆస్పత్రి కూడా ధ్వంసమైనట్లు సమాచారం.

చాలా మంది ఐక్య రాజ్య సమితి అధికారుల జాడ తెలియడం లేదని అధికార వర్గాలు చెప్పాయి. ఏ మేరకు నష్టం ఉంటుదనేది కూడా అంచనాకు అందడం లేదు. కొన్ని ప్రాంతాల్లో విద్యుత్ లేకుండా పోయింది. వేల మంది మరణించి ఉంటారని కాథలిక్ రిలీఫ్ ప్రతినిధి కరేల్ జెలెంకా చెప్పారు. నగరంలో దుమ్ము అలుముకుని ఏమీ కనిపించని స్థితి నెలకొందని ఆయన చెప్పారు. వీధుల్లో మృతదేహాలు పడి ఉన్నట్లు కూడా చెబుతున్నారు.