రాజీనామాల ఉపసంపరణ కుట్రే: యాష్కీ

నిజామాబాద్/హైదరాబాద్: తెలంగాణకు వ్యతిరేకంగా చేసే కుట్రలో భాగంగానే తెలంగాణ ప్రజాప్రతినిధులు చేసిన రాజీనామాలను ఉపసంహరించుకోవాలని సూచిస్తున్నారని తెలంగాణకు చెందిన కాంగ్రెసు పార్లమెంటు సభ్యుడు మధు యాష్కీ అన్నారు. తెలంగాణ రాష్ట్ర ఏర్పాటును అడ్డుకోవడానికే రాజీనామాలు ఉపసంహరించుకోవాలనే సూచనను కొంత మంది ముందుకు తెస్తున్నారని ఆయన శుక్రవారం నిజామాబాదులో మీడియా ప్రతినిధులతో అన్నారు. తెలంగాణ కోసం ప్రాణాలర్పించిన వారి ముందు రాజీనామాలు పెద్ద లెక్క కాదని ఆయన అన్నారు. తెలంగాణను అడ్డుకోవడానికి ఈ ప్రాంతానికి చెందిన కొంత మంది కుట్ర చేస్తున్నారని ఆయన విమర్శించారు.

ప్రజాప్రతినిధులు రాజీనామాలు ఉపసంహరించుకోవాలని కాంగ్రెసు పార్లమెంటు సభ్యుడు సర్వే సత్యనారాయణ, ప్రభుత్వ చీఫ్ విప్ మల్లు భట్టి విక్రమార్క చేసిన సూచనను తెలంగాణ రాజకీయ, ప్రజా సంఘాల జెఎసి కన్వీనర్ కోదండరామ్ ఖండించారు. తెలంగాణపై స్పష్టమైన ప్రకటన కోసం తాము డిమాండ్ చేస్తున్నామని, ఆ స్పష్టమైన వ్రకటనను వారు తెస్తే రాజీనామాల ఉపసంహరణకు అభ్యంతరమేమీ లేదని ఆయన శుక్రవారం హైదరాబాదులోని మీడియా ప్రతినిధులతో అన్నారు. తెలంగాణ రాష్ట్ర ఏర్పాటుకు కాలపరిమితితో కూడిన కార్యక్రమానికి సంబంధించి స్పష్టమైన ప్రకటన తప్ప తమకేమీ అవసరం లేదని ఆయన అన్నారు.