గుంతకల్లు ప్రైవేటీకరణకు సిఎం పచ్చజెండా

హైదరాబాద్: అనంతపురం జిల్లా గుంతకల్లులో గల ఆంధ్రా సహకార స్పిన్నింగ్ మిల్లు ప్రైవేటీకరణకు ముఖ్యమంత్రి కె. రోశయ్య పచ్చజెండా ఊపారు. జిల్లాలవారీ సమీక్షల్లో భాగంగా ఆయన శనివారం అనంతపురం జిల్లా సమస్యలపై సమీక్ష జరిపారు. ఈ సందర్భంగా గుంతకల్లు స్పిన్నింగ్ మిల్లు విషయం చర్చకు వచ్చింది. మిల్లు మూత వల్ల కార్మికులు ఇబ్బంది పడుతున్నారని ఆయన దృష్టికి వచ్చింది. దీంతో ఆయన దాని ప్రైవేటీకరణకు ముందుకు వచ్చారు.

మిల్లును నిర్వహించేందుకు ఏదైనా ప్రైవేట్ సంస్థ ముందుకు వస్తే ఆ సంస్థకు అప్పగించాలని ఆయన అధికారులను ఆదేశించారు. పెండింగులో ఉన్న 5.10 కోట్ల కార్మికుల బకాయిలను వెంటనే చెల్లించాలని కూడా ఆయన అధికారులను ఆదేశించినట్లు మంత్రి బాలినేని శ్రీనివాస రెడ్డి మీడియా ప్రతినిధులతో చెప్పారు. ఇళ్లు కట్టుకునేందుకు కార్మికులకు 10 ఎకరాల స్థలాన్ని కనీస ధరకు ఇవ్వాలని కూడా ముఖ్యమంత్రి సూచించారు.