తెలంగాణలో దానం నాగేందర్ కు చేదు అనుభవం

హైదరాబాద్: తెలంగాణ జిల్లాల్లో రాష్ట్ర ఆరోగ్య శాఖ మంత్రి దానం నాగేందర్ కు చేదు అనుభవం ఎదురైంది. తెలంగాణలోని నల్లగొండ, మెదక్ జిల్లాల్లో ఆయనకు శనివారం తెలంగాణ ఆందోళనకారుల నుంచి తీవ్ర వ్యతిరేకత ఎదురైంది. నల్లగొండ జిల్లాలోని కొలనుపాకకు బయలుదేరిన దానం నాగేందర్ ను ఆలేరులో తెలంగాణ ఆందోళనకారులు అడ్డగించారు. ఆయనను దీక్షా శిబిరానికి బలవంతంగా తీసికెళ్లారు. ఆయనను అడ్డగించి అటు తీసుకుని వెళ్లడంతో తీవ్ర నిరాశకు గురైన దానం నాగేందర్ కొలనుపాకకు వెళ్లకుండానే తిరుగు ముఖం పట్టారు.

మెదక్ జిల్లా జగదేవ్ పూర్ మండలం గణేష్ పూర్ గ్రామంలో ఆందోళనకారులు దానం నాగేందర్ కారుపై దాడి చేశారు. ఈ దాడిలో ఆయన కారు అద్దాలు పగిలిపోయాయి. అన్ని పార్టీలను సంప్రదించి హైదరాబాదులో శాంతి ర్యాలీ నిర్వహిస్తానని ఆయన నల్లగొండ జిల్లాలో చెప్పారు. తెలంగాణ రాష్ట్ర ఏర్పడితే బిసిలకు అధికారం అప్పగించాలని ఆయన కోరారు. అదుర్స్ సినిమాను అడ్డుకోవాలనే తెలంగాణ ఆందోళనకారులను నాగేందర్ తీవ్రంగా వ్యతిరేకించారు. హైదరాబాదులో శాంతిర్యాలీ నిర్వహిస్తానంటూ తెలంగాణవాదులపై ఆయన విరుచుకుపడ్డారు.