నాపై తెలంగాణ దాడి జరగలేదు: దానం

హైదరాబాద్: తనపై తెలంగాణవాదులెవరూ దాడి చేయలేదని రాష్ట్ర ఆరోగ్య శాఖ మంత్రి దానం నాగేందర్ స్పష్టం చేశారు. నల్లగొండ, మెదక్ జిల్లాల్లో తనపై దాడి జరిగిదంటూ వచ్చిన వార్తలను ఆయన ఖండించారు. తెలంగాణ ప్రజల్లో ఆవేదన, ఆవేశం ఉందని, అయితే అల్లర్ల వల్ల గొడవ వల్ల ఏమీ జరగదని తాను చెప్పానని ఆయన శనివారం మీడియా ప్రతినిధులతో అన్నారు. తెలంగాణ జెఎసిపై ఆయన ధ్వజమెత్తారు. ఎవరు పడితే వారు ఏది చెప్తే అది చేయలేనని, ఎవరో చెప్తే తాను రాజీనామా చేయలేనని ఆయన అన్నారు. తమ పార్టీ అధ్యక్షురాలు సోనియా గాంధీ ఏది ఆదేశిస్తే దానికి తాను కట్టుబడి ఉంటానని, సోనియా గాంధీ తీసుకునే నిర్ణయానికి కట్టుబడి ఉంటానని ఆయన చెప్పారు.

సోనియా గాంధీకి తెలంగాణ అంశాన్ని వదిలేసిన తర్వాత, అఖిల పక్ష సమావేశం ఏర్పాటు చేసిన తర్వాత తెలంగాణ కోసం ఆందోళనలు సరి కాదని ఆయన అన్నారు. యాభై ఏళ్లుగా పోరాటం చేస్తున్న తెలంగాణ ప్రజలకు న్యాయం జరగాలని ఆయన అన్నారు. హైదరాబాదులో ఆందోళనలు కొనసాగితేనే శాంతి ర్యాలీ నిర్వహిస్తామని, అన్ని పార్టీలతో చర్చించి శాంతి ర్యాలీపై నిర్ణయం తీసుకుంటామని ఆయన చెప్పారు. శాంతి ర్యాలీ తెలంగాణకు వ్యతిరేకం కాదని ఆయన అన్నారు. రాజీనామాల ఉపసంహరణపై పార్టీ అధిష్టానం చూసుకుంటుందని ఆయన చెప్పారు. అందరి రక్షణకు తాను ముందుంటానని ఆయన చెప్పారు.