తెలంగాణ ప్రక్రియ పూర్తి చేయాలి: జానా

హైదరాబాద్: నిర్దిష్ట కాల పరిమితితో తెలంగాణ రాష్ట్ర ఏర్పాటు ప్రక్రియను పూర్తి చేయాలని మాజీ హోం మంత్రి, కాంగ్రెసు సీనియర్ శాసనసభ్యుడు కె. జానారెడ్డి కేంద్ర ప్రభుత్వాన్ని కోరారు. తెలంగాణ జెఎసి ఆధ్వర్యంలో ప్రారంభమైన రిలే నిరాహార దీక్షల శిబిరాన్ని ఆయన శనివారం సందర్శించి మాట్లాడారు. తెలంగాణ ప్రజల ఆకాంక్షను ప్రతి క్షణం గుర్తు చేయడానికే శాంతియుతంగా నిరసన దీక్షలు, ఆందోళనలు చేపడుతున్నట్లు ఆయన తెలిపారు.

ప్రజల ఆశించినట్లుగా కేంద్ర ప్రభుత్వం తెలంగాణ రాష్ట్ర ఏర్పాటు ప్రక్రియను వేగవంతంగా పూర్తి చేయాలని ఆయన కోరారు. తెలంగాణ రాష్ట్ర సాధన కోసం కాంగ్రెసు పార్టీ అగ్రభాగాన ఉంటుందని ఆయన చెప్పారు. తెలంగాణ రాష్ట్ర ఏర్పాటు పూర్తయ్యే వరకు ప్రశాంతంగా ఉద్యమం కోనసాగిస్తామని చెప్పారు. ఈ విషయాన్ని సీమాంధ్ర నేతలు అర్థం చేసుకోవాలని ఆయన కోరారు. కాంగ్రెసు పార్లమెంటు సభ్యుడు మందా జగన్నాథం తదితరులు కూడా దీక్షా శిబిరాన్ని సందర్శించి తమ సంఘీభావం తెలిపారు.