బోర్ వెల్ లో పడిన మహేష్ క్షేమమే

వరంగల్: వరంగల్ జిల్లా చంద్రూ తండాలో బోరుబావిలో పడిన రెండేళ్ల బాలుడు మహేష్ క్షేమంగానే ఉన్నట్లు తెలుస్తోంది. మహేష్ ను వెలికి తీయడానికి గత 16 గంటలుగా సహాయక చర్యలు కొనసాగుతున్నాయి. బోర్ బావికి సమాంతరంగా మరో బావిని తీసి మహేష్ ను రక్షించడానికి ప్రయత్నాలు సాగుతున్నాయి. పైపుల ద్వారా మహేష్ కు ఆక్సిజన్ పంపుతున్నారు. సోమవారం ఉదయం 9 గంటల సమయానికి సమాంతరంగా 24 అడుగుల మేర బావి తవ్వారు. మరో ఆరడుగులు తవ్వితే మహేష్ ను రక్షించడానికి వీలవుతుందని భావిస్తున్నారు. అయితే బండరాళ్లు అడ్డురావడంతో తవ్వకం పనులు మందకొడిగా సాగుతున్నాయి.

నాలుగు ప్రొక్లెయిన్లతో బోరు బావిని తవ్వుతున్నారు. సింగరేణి రెస్క్యూ టీమ్స్ సహాయక చర్యల్లో పాల్గొంటున్నాయి. జిల్లా కలెక్టర్, ఎస్పీ సహాయక చర్యలను పర్యవేక్షిస్తున్నారు. తెలుగుదేశం శాసనసభ్యుడు ఎర్రబెల్లి దయాకర రావు కూడా అక్కడే ఉన్నారు. మహేష్ క్షేమంగా ఉన్నట్లు బావిలోకి పంపిన నైట్ విజన్ కెమెరా దృశ్యాల్లో కనిపిస్తోంది. ఆదివారం రాత్రి ఏడు గంటల వరకు బాలుడు ఏడుపులు వినిపించాయని అంటున్నారు.