తెలంగాణకు సారథ్యం వహించను: కె కేశవరావు

హైదరాబాద్: తెలంగాణపై తమ పార్టీ పెద్దలతో మాట్లాడే కాంగ్రెసు నేతలకు తాను నేతృత్వం వహించడం లేదని కాంగ్రెసు సీనియర్ నాయకుడు కె. కేశవరావు స్పష్టం చేశారు. తెలంగాణ ప్రతినిధి బృందానికి తాను నేతృత్వం వహించడం లేదని ఆయన సోమవారం మీడియా ప్రతినిధులతో చెప్పారు. తెలంగాణ ఉద్యమం ప్రతి ఇంటికీ పాకిందని ఆయన చెప్పారు. తెలంగాణ ఉద్యమానికి మావోయిస్టులకు ముడి పెట్టవద్దని ఆయన సూచించారు. రాజీనామాలపై తమ పార్టీ ప్రజాప్రతినిధులే నిర్ణయం తీసుకుంటారని, ఈ విషయంలో తాను చెప్పేదేమీ లేదని ఆయన చెప్పారు.

తెలంగాణ ప్రక్రియ వేగవంతం కావడం లేదని ఈ ప్రాంత నాయకుల్లో ఆవేదన నెలకొనడం సహజమని ఆయన అన్నారు. తెలంగాణపై తమ కాంగ్రెసు పార్టీ వెనక్కి తగ్గదని ఆయన అన్నారు. తెలంగాణ అంశాన్ని అన్ని పార్టీలు ఎన్నికల్లో మానిఫెస్టోలో పెట్టినప్పుడే తెలంగాణ వచ్చేసినట్లయిందని ఆయన అన్నారు. తెలంగాణ అంశాన్ని యుపిఎ ఉమ్మడి కార్యాచరణ ప్రణాళికలో పెట్టిందని, రాష్ట్రపతి ప్రసంగంలో కూడా చేర్చిందని, దాన్ని కేంద్ర మంత్రి వర్గం ఆమోదించిందని ఆయన చెప్పారు. అందుకే అసెంబ్లీలో తీర్మానం చేయాలని కేంద్ర హోం మంత్రి పి. చిదంబరం సూచించినట్లు ఆయన తెలిపారు.