కృష్ణా జిల్లా: అక్కినేని వారధిపై జూదం, వ్యభిచారం

గుడివాడ: మండలపరిధిలోని కుదరవల్లి సమీపంలో బుడమేటి డ్రెయిన్‌ పై గల అక్కినేని వారధి అసాంఘిక కార్యకలాపాలకు అడ్డాగా మారింది. కృష్ణా, పశ్చిమగోదావరి జిల్లాలను కలుపుతూ రూ.12కోట్ల రూపాయలతో నిర్మించిన ఈ వంతెనను 2003లో ప్రారంభించారు. దీనికి ఈ ప్రాంతానికి చెందిన ప్రముఖ నటుడు అక్కినేని నాగేశ్వరరావు పేరు పెట్టారు. అధునాతనంగా వంతెన నైతే నిర్మించారు గానీ లైటింగ్‌ ఏర్పాటు చేయలేదు. దీంతో రాత్రుళ్లు వంతెనపై జూదం, వ్యభిచారం వంటి కార్యకలాపాలు యథేచ్ఛగా సాగుతున్నట్లు స్థానికులు చెబుతున్నారు. వంతెనపై గేదెలు, గొర్రెలను కట్టి వాహనదారులను ఇబ్బందులు కలిగిస్తున్నారని అంటున్నారు.

రెండు నెలల క్రితం రోడ్లు, భవనాలశాఖ మంత్రి గల్లా అరుణకుమారి మండలానికి వచ్చినప్పుడు ఈ సమస్యను వివరించగా, వంతెనపై లైట్లను ఏర్పాటు చేసేందుకు జిల్లా పరిషత్‌ నిధుల నుంచి రూ.5 లక్షలు మంజూరు చేస్తున్నట్లు చెప్పారని కుదరవల్లి సర్పంచ్‌ గోధుమ శైలజ తెలిపారు. అయితే ఇప్పటివరకు కార్యరూపం దాల్చలేదన్నారు.

వంతెనపై లైట్లు ఏర్పాటు చేసేందుకు జిల్లా పరిషత్‌ నుంచి రూ.5 లక్షలు నిధులు మంజూరైన సంగతి వాస్తవమేనని విద్యుత్‌ శాఖ ఏఈ శ్రీనివాసరావు తెలిపారు. సంబంధిత కాంట్రాక్టర్‌ వంతెనపై పోల్స్‌, లైట్లను ఏర్పాట చేస్తే, విద్యుత్‌ సరఫరా చేయడానికి తమకు ఎటువంటి అభ్యంతరం లేదన్నారు.