రాజీనామాలు చేయాల్సిందే: టిడిపి

హైదరాబాద్: తెలంగాణపై కేంద్ర ప్రభుత్వం మీద ఒత్తిడి తెచ్చేందుకు కేంద్ర మంత్రి ఎస్ జైపాల్ రెడ్డి సహా కాంగ్రెసు ప్రజాప్రతినిధులంతా రాజీనామాలు చేయాల్సిందేనని తెలుగుదేశం పార్టీ నాయకుడు, శాసనసభ్యుడు మోత్కుపల్లి నర్సింహాలు అన్నారు. సంక్షోభం సృష్టించడం ద్వారా మాత్రమే తెలంగాణ రాష్ట్ర సాధన సాధ్యమని ఆయన అన్నారు. జెఎసి ఆధ్వర్యంలో హైదరాబాదులోని ఇందిరా పార్కు వద్ద సోమవారం తెలంగాణ నేతల రిలే నిరాహార దీక్షలు పదో రోజుకు చేరుకున్నాయి. తెలంగాణ ఇచ్చేది కాంగ్రెసు పార్టీయే అంటున్న ఆ పార్టీ నేతలు తెలంగాణ సాధిస్తే అంతకు మించి కావాల్సిందేమీ లేదని ఆయన అన్నారు. జెఎసి నిర్ణయానికి కట్టుబడి ఈ నెల 28వ తేదీ తర్వాత రాజీనామాలను ఆమోదింపజేసుకోవాలని ఆయన అభిప్రాయపడ్డారు.

ప్రజాప్రతినిధులు, మంత్రులు ఢిల్లీ వెళ్లినా ప్రయోజనం ఉండదని, వారికి అపాయింట్ మెంటు కూడా దొరకదని ఆయన అన్నారు. తెలంగాణకు తెలుగుదేశం కట్టుబడి ఉందని, ఈ అంశంపై పార్టీలన్నీ ఒకే తాటి మీదికి రావాలని ఆనయ అన్నారు. ఇస్తారా, చస్తారా అనే పద్ధతిలో పోతేనే సాధ్యమవుతుందని ఆయన అన్నారు. ప్రజల ఆకాంక్ష కోసమే తాము కలిసి ఉన్నామని, జెండాలు, ఎజెండాలు పక్కన పెట్టి పని చేస్తున్నామని ఆయన చెప్పారు. జెఎసి కన్వీనర్ కోదండరామ్ ను సీమాంధ్ర నాయకులు విమర్శించడాన్ని మరో తెలుగుదేశం నాయకుడు ఎర్రబెల్లి దయాకర్ తప్పు పట్టారు. తెలంగాణ రాజకీయ నాయకులంతా తీసుకున్న నిర్ణయాలను కోదండరామ్ వెల్లడిస్తున్నారని ఆయన చెప్పారు.