డెడ్ లైన్ మారే ప్రసక్తి లేదు: కె చంద్రశేఖర రావు

హైదరాబాద్: తెలంగాణపై ఈ నెల 28వ తేదీలోగా కేంద్ర ప్రభుత్వం నుంచి స్పష్టమైన ప్రకటన రాకపోతే ప్రజాప్రతినిధులు రాజీనామాలను ఆమోదింపజేసుకోవాలనే జెఎసి నిర్ణయంలో ఎటువంటి మార్పు లేదని తెలంగాణ రాష్ట్ర సమితి (తెరాస) అధ్యక్షుడు కె చంద్రశేఖర రావు చెప్పారు. డెడ్ లైన్ మారే ప్రసక్తి లేదని ఆయన గురువారం మీడియా ప్రతినిధులతో అన్నారు. శాసనసభ్యులు రేపు శుక్రవారం ర్యాలీగా వెళ్లి శాసనసభలో బైఠాయిస్తారని, స్పీకర్ రాజీనామాలు ఆమోదించేవరకు అక్కడి నుంచి కదలబోరని ఆయన అన్నారు.

ఢిల్లీ వెళ్లిన కాంగ్రెసు తెలంగాణ నాయకులు ఆర్ దామోదర్ రెడ్డి, కె. జానారెడ్డి తెలంగాణకు సానుకూలమైన ప్రకటన తెస్తారని ఆశిస్తున్నట్లు ఆయన తెలిపారు. తాజా పరిస్థితిపై చర్చించేందుకు జెఎసి గురువారం సాయంత్రం మరోసారి సమావేశమవుతుందని ఆయన చెప్పారు. రాజీనామాలను ఆమోదింపజేసుకుని రాజ్యాంగ సంక్షోభం సృష్టించే విషయంలో తెలుగుదేశం పార్టీ తెలంగాణ నాయకులు కూడా వెనక్కి తగ్గడం లేదు. బిజెపి కూడా రాజీనామాలపై పట్టుపడుతోంది.