హైదరాబాదులో అభ్యంతరం లేదు: మోడీ

హైదరాబాద్: ఐపియల్ మ్యాచులు హైదరాబాదులో నిర్వహించడానికి అభ్యంతరం లేదని ఐపియల్ కమిషనర్ లలిత్ మోడీ తెలిపారు. తెలంగాణ ఉద్యమం కారణంగా ఐపియల్ మ్యాచులు హైదరాబాదు నుంచి తరలిపోవచ్చుననే ఊహాగానాలు చెలరేగుతున్న నేపథ్యంలో ఆయన ఆ ప్రకటన చేశారు. తాము ఐపియల్ మ్యాచులను అడ్డుకోబోమని తెలంగాణ రాజకీయ, ప్రజా సంఘాల జెఎసి కన్వీనర్ కోదండరామ్ పదే పదే ప్రకటన చేశారు. ఈ మేరకు లలిత్ మోడీకి ఓ బహిరంగ లేఖ కూడా రాశారు. దీంతో లలిత్ మోడీ హైదరాబాదులోని మ్యాచులు నిర్వహించే విషయంపై ప్రకటన చేశారు.

కాగా, ఐపియల్ 3 మ్యాచులను విశాఖపట్నంలో నిర్వహించే విషయంపై ఐపియల్ నిర్వాహకులు ఆలోచన చేస్తున్నారు. విశాఖపట్నాన్ని అందుకు అనువైందా, కాదా అనే విషయంపై వారు పరిశీలన జరుపుతున్నారు. ఐపియల్ లో పాకిస్తాన్ క్రీడాకారులకు స్థానం కల్పించబోతున్నారు. ఐపియల్ లో పాకిస్తాన్ క్రీడాకారులకు స్థానం కల్పించకపోవడంపై భారత్, పాకిస్తాన్ ల మధ్య తీవ్ర వివాదం చెలరేగింది. దీంతో పాక్ క్రీడాకారులను ఐపియల్ లోకి తీసుకోవాలని నిర్ణయించుకున్నారు. హైదరాబాద్ కు చెందిన దక్కన్ చార్జర్స్ తరఫున పాకిస్తాన్ క్రీడాకారుడు అబ్దుల్ రజాక్ ఆడనున్నాడు.