తెలంగాణ ప్రస్తావన లేని ప్రెస్ నోట్

న్యూఢిల్లీ: జస్టిస్ శ్రీకృష్ణ కమిటీని ఏర్పాటు చేస్తూ రాష్ట్ర విభజనపై కేంద్ర హోం మంత్రిత్వ శాఖ బుధవారం విడుదల చేసిన ప్రకటనలో తెలంగాణ ప్రస్తావన లేదు. ఈ కమిటీ అన్ని ప్రాంతాల, అన్ని వర్గాల ప్రజల, రాజకీయ నాయకుల అభిప్రాయాలు తీసుకుంటుందని తెలిపారు. మూడు రోజుల్లో కమిటీ విధివిధానాలు ఖరారయ్యే అవకాశం ఉంది. కమిటీ చైర్మన్ గా నియమితులైన శ్రీకృష్ణ వెంటనే ముంబై నుంచి ఢిల్లీకి బయలుదేరారు. విధివిధానాలను స్వయంగా బిఎన్ శ్రీకృష్ణ ప్రకటించే అవకాశం.

కమిటీ ప్రకటనపై మిశ్రమ స్పందన వ్యక్తమవుతోంది. కమిటీ విచారణాంశాలపైనే ఉత్కంఠ నెలకొంది. కాలపరిమితి గానీ విధివిధానాలు గానీ లేకపోవడం పట్ల భిన్నాభిప్రాయాలు వ్యక్తమవుతున్నాయి. కమిటీపై తెలంగాణ కాంగ్రెసు పార్లమెంటు సభ్యులు ఏమీ మాట్లాడలేకపోతున్నారు. తాము చర్చించుకున్న తర్వాత మాట్లాడుతామని కాంగ్రెసు పార్లమెంటు సభ్యుడు పొన్నం ప్రభాకర్ అన్నారు. కమిటీ ప్రకటన వెలువడిన వెంటనే సీమాంధ్ర నాయకులు కోస్తా కాంగ్రెసు పార్లమెంటు సభ్యుడు కావూరి సాంబశివ రావు నివాసంలో సమావేశమయ్యారు.