ఇరకాటంలో కాంగ్రెసు తెలంగాణ నేతలు

హైదరాబాద్: శ్రీకృష్ణ కమిటీ విధివిధానాల నేపథ్యంలో కాంగ్రెసు తెలంగాణ నేతలు ఇరకాటంలో పడ్డారు. విధివిధానాలను వ్యతిరేకించలేక, స్వాగతించలేక వారు ఇబ్బంది పడుతున్నారు. విధివిధానాలపై తెలంగాణలో సర్వత్రా నిరసన వ్యక్తమవుతున్న నేపథ్యంలో కాంగ్రెసు తెలంగాణ నేతలు రెండు రకాల అభిప్రాయాలను వ్యక్తం చేస్తున్నారు. సబితా ఇంద్రారెడ్డి, కోమటిరెడ్డి వెంకట రెడ్డి వంటి మంత్రులు, మరికొంత మంది నాయకులు విధివిధానాలను స్వాగతిస్తుండగా, మధుయాష్కి వంటి నేతలు వ్యతిరేకిస్తున్నారు. తెలంగాణ జెఎసిలో ప్రముఖ పాత్ర పోషిస్తున్న ఆర్ దామోదర్ రెడ్డి తమ పార్టీ నేతలతో మాట్లాడి తగిన నిర్ణయం తీసుకుంటామని చెప్పారు. విధివిధానాలు వెల్లడైన తర్వాత కాంగ్రెసు తెలంగాణ శాసనసభ్యులు, ఎమ్మెల్సీలు శుక్రవారం సాయంత్రం సమావేశమయ్యారు. ఈ సమావేశంలో వారు ఎటూ తేల్చుకోలేకపోయారు.

విధివిధానాలను వ్యతిరేకిస్తూ రాజీనామాలు చేయాలని తెలంగాణ ప్రజలనుంచి కాంగ్రెసు నాయకులపై ఒత్తిడి పెరుగుతోంది. శుక్రవారం కరీంనగర్ జిల్లాలో పార్లమెంటు సభ్యుడు పొన్నం ప్రభాకర్ కు, మంత్రి శ్రీధర్ బాబుకు ఆందోళనకారులు వేర్వేరు చోట్ల అడ్డం పడ్డారు. రాజీనామాలు చేయాలని డిమాండ్ చేస్తూ వారిని చుట్టుముట్టారు. నల్లగొండ జిల్లాలో మాజీ మంత్రి కె. జానారెడ్డికి కూడా ప్రజల నుంచి తీవ్ర వ్యతిరేకత ఎదురైంది. తెలంగాణ సాధించి తీరుతామని ఆయన వారికి నచ్చజెప్పే ప్రయత్నం చేశారు. ఈ స్థితిలో రాజీనామాలకు సిద్ధపడని తెలంగాణ కాంగ్రెసు నాయకులు తీవ్ర వ్యతిరేకతను ఎదుర్కునే పరిస్థితి ఉంది. ప్రజల కోరిక మేరకు వ్యవహరించలేక, పార్టీ అధిష్టానం నిర్ణయాన్ని వ్యతిరేకించలేక వారు సతమతమవుతున్నారు.