ఇదేమైనా పాక్ సరిహద్దా: కిషన్ రెడ్డి

హైదరాబాద్: తెలంగాణ విద్యార్థుల అసెంబ్లీ ముట్టడి సందర్భంగా చేసిన భద్రతా ఏర్పాట్ల తీరును బిజెపి శాసనసభా పక్ష నాయకుడు జి. కిషన్ రెడ్డి తప్పు పట్టారు. పాక్, బంగ్లా సరిహద్దుల్లో కూడా ఇటువంటి భద్రతా ఏర్పాట్లు లేవని ఆయన శనివారం మీడియా ప్రతినిధులతో అన్నారు. పోలీసులు అనవసరమైన రాద్ధాంతం చేస్తున్నారని ఆయన విమర్శించారు. హైదరాబాదులోని బర్కత్ పురాలో గల తన ఇంటి నుంచి శాసనసభకు రావపడానికి తనకు 75 నిమిషాల సమయం పట్టిందని ఆయన అన్నారు. అంత కట్టుదిట్టమైన భద్రతా ఏర్పాట్ల అవసరం ఏమొచ్చిందని ఆయన అడిగారు. పోలీసుల అతి వల్లనే సమస్య తలెత్తుతోందని ఆయన అన్నారు.

ప్రజాస్వామ్యంలో పోలీసులు వ్యవహరిస్తున్న తీరు సరైంది కాదని ఆయన అన్నారు. పోలీసులు, బారికేడ్లతో ఉద్యమాన్ని అడ్డుకోవాలని అనుకోవడం అవివేకమని ఆయన అన్నారు. అణిచివేసే కొద్ది ఉద్యమం మరింత ఎగిసిపడుతుందని ఆయన అన్నారు. పోలీసులు సంయమనంతో వ్యవహరించాలని ఆయన సూచించారు.